An unconventional News Portal.

‘ಸ್ಟಿಂಗ್ ಆಪರೇಷನ್’ ಸುತ್ತ ಹುಟ್ಟಿಕೊಂಡಿರುವ ಜಿಜ್ಞಾಸೆ: ಪತ್ರಿಕೋದ್ಯಮಕ್ಕೆ ಇದರಿಂದ ಲಾಭನಾ? ನಷ್ಟನಾ?

‘ಸ್ಟಿಂಗ್ ಆಪರೇಷನ್’ ಸುತ್ತ ಹುಟ್ಟಿಕೊಂಡಿರುವ ಜಿಜ್ಞಾಸೆ: ಪತ್ರಿಕೋದ್ಯಮಕ್ಕೆ ಇದರಿಂದ ಲಾಭನಾ? ನಷ್ಟನಾ?

ಕುಟುಕು ಕಾರ್ಯಾಚರಣೆ..

ಪತ್ರಿಕೋದ್ಯಮಕ್ಕೆ ಒಳ್ಳೆದೋ, ಕೆಟ್ಟದ್ದೋ?

ಅಥವಾ ಪತ್ರಿಕೋದ್ಯಮನೇ ಅಲ್ವಾ?

ಪತ್ರಿಕೋದ್ಯಮದಲ್ಲಿಯೇ ಈ ಪ್ರಶ್ನೆಗಳಿಗೆ ಒಂದೇ ಉತ್ತರ ಸಿಗುವುದಿಲ್ಲ. ರಾಜ್ಯಸಭಾ ಚುನಾವಣೆಯಲ್ಲಿ ಶಾಸಕರ ‘ಕುದುರೆ ವ್ಯಾಪಾರ’ಕ್ಕೆ ಸಂಬಂಧಿಸಿದಂತೆ ಎರಡು ರಾಷ್ಟ್ರೀಯ ವಾಹಿನಿಗಳು ಕುಟುಕು ಕಾರ್ಯಾಚರಣೆ ನಡೆಸಿದ್ದವು. ಅದರಲ್ಲೂ ‘ಟೈಮ್ಸ್ ನೌ’ ವಾಹಿನಿಯ ಕುಟುಕು ಕಾರ್ಯಾಚರಣೆ ವಿವಾದಕ್ಕೆ ಕಾರಣವಾಗಿತ್ತು. ಈ ಹಿನ್ನಲೆಯಲ್ಲಿ ಕುಟುಕು ಕಾರ್ಯಾಚರಣೆ ಸುತ್ತಾ ಚರ್ಚೆಯೊಂದು ಆರಂಭವಾಗಿದೆ.

ಈ ಹಿನ್ನೆಲೆಯಲ್ಲಿ ‘ಸಮಾಚಾರ’ ಕುಟುಕು ಕಾರ್ಯಾಚರಣೆ ಹಾಗೂ ತನಿಖಾ ಪತ್ರಿಕೋದ್ಯಮದ ಕುರಿತು ಇರುವ ಜಿಜ್ಞಾಸೆಗಳನ್ನು ನಿಮ್ಮ ಮುಂದಿಡುತ್ತಿದೆ.

ಸ್ಟಿಂಗ್ ಆಪರೇಷನ್ ಪತ್ರಿಕೋದ್ಯಮಕ್ಕೆ ಹೊಸದಲ್ಲ. ಎದುರಿದ್ದವರು ಮಾತಾಡಿದ್ದನ್ನು ಗೊತ್ತೇ ಆಗದಂತೆ ರಹಸ್ಯ ಕ್ಯಾಮೆರಾ ಬಳಸಿ ಚಿತ್ರೀಕರಣ ಮಾಡುವುದೇ ‘ಕುಟುಕು ಕಾರ್ಯಾಚರಣೆ’ ಅಥವಾ ‘ಸ್ಟಿಂಗ್ ಆಪರೇಶನ್’. ಭಾರತದಲ್ಲಿ ಮ್ಯಾಗಜಿನ್, ಪತ್ರಿಕೆಗಳು, ಸುದ್ದಿ ವಾಹಿನಿಗಳು ‘ಕುಟುಕು ಕಾರ್ಯಾಚರಣೆ’ ನಡೆಸುವ ಸಂಪ್ರದಾಯವಿದೆ. ಈ ದೇಶದ ಪತ್ರಿಕೋದ್ಯಮದ ಏರಿಳಿತಗಳನ್ನು, ರಾಜಕೀಯ ಸ್ಥಿತ್ಯಂತರಗಳನ್ನು ಈ ‘ಕುಟುಕು ಕಾರ್ಯಾಚರಣೆ’ ನಿರ್ಧರಿಸಿರುವ ಉದಾಹರಣೆಗಳು ಸಾಕಷ್ಟಿವೆ. ಈ ಕುರಿತು ಕನಿಷ್ಟ ಮಾಹಿತಿ ಇವತ್ತು ಎಲ್ಲರಲ್ಲಿಯೂ ಇರುವ ಸಾಧ್ಯತೆಗಳು ಇರುವುದರಿಂದ ಅದರ ಕುರಿತು ಇನ್ನಷ್ಟು ಆಳಕ್ಕೆ ಹೋಗುವ ಅಗತ್ಯವಿಲ್ಲ.

ಆದರೆ, ಈ ಸ್ಟಿಂಗ್ ಆಪರೇಷನ್ ತುಂಬಾ ನ್ಯಾಯ ಸಮ್ಮತ ಅಥವಾ ಪತ್ರಿಕೋದ್ಯಮದ ‘ಸಾಚಾ ಮಾರ್ಗ’ ಎಂದು ಎಲ್ಲರೂ ಒಪ್ಪಿಕೊಳ್ಳುವುದಿಲ್ಲ. ಅದರಲ್ಲೂ ಪತ್ರಿಕೋದ್ಯಮ ಉತ್ತರದಾಯಿತ್ವವಾಗಿರಬೇಕು ಎಂದು ನಂಬಿರುವವರು ಈ ಕುಟುಕು ಕಾರ್ಯಾಚರಣೆಗಳನ್ನು ಒಪ್ಪುವುದಿಲ್ಲ. ಇಲ್ಲಿ ಸುದ್ದಿಗಾಗಿ ಸುಳ್ಳು ಹೇಳಬೇಕಾಗುತ್ತದೆ. ಪತ್ರಕರ್ತ ಅಥವಾ ವರದಿಗಾರ ತನ್ನ ಮಿತಿಯನ್ನು ಮೀರಿ ವ್ಯವಹರಿಸಬೇಕಾಗುತ್ತದೆ. ಹೀಗಾಗಿ ರಹಸ್ಯ ಕ್ಯಾಮೆರಾ ಬಳಸಿಕೊಳ್ಳುವುದನ್ನು ಒಂದು ವರ್ಗ ಒಪ್ಪುವುದಿಲ್ಲ.

‘ಕುಟುಕು ಕಾರ್ಯಚರಣೆ’ಗಳ ಬಗೆಗಿರುವ ಇನ್ನೊಂದು ಅಪವಾದ ಎಂದರೆ ಇದು ಹೆಚ್ಚು ಶ್ರಮ ಇಲ್ಲದೆ ಸುದ್ದಿ ಹೆಕ್ಕುವ ಪ್ರಕ್ರಿಯೆ ಎಂಬುದು. ತನಿಖಾ ವರದಿಯೊಂದನ್ನು ಮಾಡಬೇಕಾದರೆ, ನೂರಾರು ಪುಟಗಳ ದಾಖಲೆಗಳನ್ನು ಅಧ್ಯಯನಕ್ಕೆ ಒಳಪಡಿಸಬೇಕಾಗುತ್ತದೆ. ಆದರೆ, ಕುಟುಕು ಕಾರ್ಯಾಚರಣೆ ಹೆಚ್ಚು ಶ್ರಮವನ್ನು ಬೇಡುವುದಿಲ್ಲ. ಹೀಗಾಗಿ, ಇದನ್ನು ‘ಲೇಜಿ ಜರ್ನಲಿಸಂ’ ಎಂದೂ ಕರೆಯುವುದೂ ಇದೆ. ಇದೇ ಕಾರಣದಿಂದ ಇವತ್ತು ಅಂತರಾಷ್ಟ್ರೀಯ ವಾಹಿನಿಗಳು, ಪತ್ರಿಕೆಗಳು ಹೊರತರುವ ತನಿಖಾ ವರದಿಗಳಲ್ಲಿ ರಹಸ್ಯ ಕ್ಯಾಮೆರಾಗಳ ದೃಶ್ಯಾವಳಿಗಳಿಗಿಂತ, ದಾಖಲೆಗಳ ನಿಖರತೆ ಇರುತ್ತದೆ. ಅದನ್ನು ಅವು ತನಿಖಾ ಪತ್ರಿಕೋದ್ಯಮ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುತ್ತವೆ. ಇತ್ತೀಚಿಗೆ ‘ಪನಾಮ ಪೇಪರ್ಸ್’ ವರದಿಗಳನ್ನು ಈ ನಿಟ್ಟಿನಲ್ಲಿ ಗಮನಿಸಬಹುದು.

ಒಂದು ಆಯಾಮದಲ್ಲಿ ‘ಕುಟುಕು ಕಾರ್ಯಚರಣೆ’ಗಳು ಮುಖೇಡಿಗಳ ಪತ್ರಿಕೋದ್ಯಮವೂ ಹೌದು. ಯುದ್ಧಭೂಮಿಯಿಂದ ಬಂದ ವರದಿಗಳು, ಭಾರತದಲ್ಲೇ ಬಿಂದ್ರನ್ ವಾಲೇ- ವೀರಪ್ಪನ್ ಸಂದರ್ಶನಗಳು, ಅಸ್ಸಾಂ ಹಿಂಸಾಚಾರ, ನಕ್ಸಲರ ಬೇಸ್ ಕ್ಯಾಂಪಿನಿಂದ ಹೊರಬಂದ ವರದಿಗಳಿಗೆ ಹೋಲಿಸಿದರೆ ಈ ಕುಟುಕು ಕಾರ್ಯಾಚರಣೆಗಳಿಂದ ಹೊರಬಂದ ವರದಿಗಳು ಹೆಚ್ಚು ದಿನ ಜನರ ಮನಸ್ಸಿನಲ್ಲಿ ಉಳಿದ ಉದಾಹರಣೆಗಳು ಕಡಿಮೆ- ‘ತೆಹೆಲ್ಕಾ’ ಹೊರತು ಪಡಿಸಿ.

ಹಾಗಂಥ ಎಲ್ಲಾ ವರದಿಗಳನ್ನೂ ಸಾಂಪ್ರದಾಯಿಕ ತನಿಖಾ ಪತ್ರಿಕೋದ್ಯಮದ ಚೌಕಟ್ಟಿನಲ್ಲೇ ಬಿಡಿಸಲು ಸಾಧ್ಯವಿಲ್ಲ. ಆಗ ನಿಜವಾಗಿಯೂ ಉಪಯೋಗಕ್ಕೆ ಬರುವುದು ಇದೇ ಕುಟುಕು ಕಾರ್ಯಾಚರಣೆ. ಹೆಚ್ಚಿನ ಸಂದರ್ಭಗಳಲ್ಲಿ ಕುಟುಕು ಕಾರ್ಯಾಚರಣೆಗಳು ವ್ಯಕ್ತಿಗಳು, ಸಂಸ್ಥೆಗಳನ್ನು ಕಾನೂನಿನ ಅಡಿಯಲ್ಲಿ ಶಿಕ್ಷಿಸುವಲ್ಲಿ ಸೋತಿವೆ. ಆದರೆ ಮಾನವನ್ನು ಸಾರ್ವಜನಿಕವಾಗಿ ಹರಾಜು ಹಾಕಿವೆ. ಈ ಕಾರಣದಿಂದಾದರೂ ಸ್ಟಿಂಗ್ ಆಪರೇಷನ್ಗೆ ಅದರದ್ದೇ ಆದ ಸಾಧ್ಯತೆ ಮತ್ತು ಅವಕಾಶಗಳಿವೆ.

ಇವತ್ತು ದಾಖಲೆಗಳನ್ನು ಇಟ್ಟುಕೊಂಡು ವರದಿಗಳನ್ನು ಬರೆಯುವ ‘ಡಾಟಾ ಜರ್ನಲಿಸಂ’ಗೆ ಪೂರಕವಾಗಿ ಸ್ಟಿಂಗ್ ಆಪರೇಷನ್ ಅನಿವಾರ್ಯವಾದರೆ ಬಳಸಿಕೊಳ್ಳುವ ಹೊಸ ಸಂಪ್ರದಾಯವೊಂದು ಬೆಳೆಯುತ್ತಿದೆ. ಇದು ಸ್ಟಿಂಗ್ ಬೇಕು ಅಥವಾ ಬೇಡ ಎಂಬ ಎರಡು ಅಭಿಪ್ರಾಯಗಳ ನಡುವೆ ಕಂಡುಕೊಂಡಿರುವ ದಾರಿಯಂತೆ ಕಾಣುತ್ತದೆ.

ಮಾಹಿತಿ: ದಿ ಸಿಟಿಜನ್

ENTER YOUR E-MAIL

Name
Email *
March 2017
M T W T F S S
« Feb    
 12345
6789101112
13141516171819
20212223242526
2728293031  

Top