An unconventional News Portal.

ಗುಪ್ತವಾಗಿ ನಡೆದ ‘ಸೋಮಯಾಗ’ ಮತ್ತು ಚರ್ಚೆಗೆ ಬಂದ ಪ್ರಜಾವಾಣಿ ವಿಶ್ವಾಸಾರ್ಹತೆ!

ಗುಪ್ತವಾಗಿ ನಡೆದ ‘ಸೋಮಯಾಗ’ ಮತ್ತು ಚರ್ಚೆಗೆ ಬಂದ ಪ್ರಜಾವಾಣಿ ವಿಶ್ವಾಸಾರ್ಹತೆ!

ಶಿವಮೊಗ್ಗದ ಹೊರವಲಯದಲ್ಲಿರುವ ಮತ್ತೂರು ಎಂಬ ದೇಶದ ಏಕೈಕ ‘ಸಂಸ್ಕೃತ ಗ್ರಾಮ’ದಲ್ಲಿ ಗುಪ್ತವಾಗಿ ನಡೆದಿದ್ದ ‘ಸೋಮಯಾಗ’ಕ್ಕೆ ಸಂಕೇತಿಗಳಿಂದ ಬಂದ ವಿರೋಧದ ಸುದ್ದಿಯನ್ನು ‘ಪ್ರಜಾವಾಣಿ’ ಬುಧವಾರ ಪ್ರಕಟಿಸಿದೆ.

ಈ ಮೂಲಕ ಹಲವು ದಿನಗಳ ನಂತರ ಕನ್ನಡದ ‘ದಿನ ಪತ್ರಿಕೆ’ಯ ಸುದ್ದಿಯೊಂದು ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ಸುದ್ದಿವಾಹಿನಿಗಳು ‘ಪ್ರಜಾವಾಣಿ’ಯ ಈ ಸುದ್ದಿಯನ್ನು ತಮ್ಮದೇ ಒಳನೋಟಗಳ ಮೂಲಕ ಪ್ರಸಾರ ಮಾಡುತ್ತಿವೆ. ಸುದ್ದಿ ಜತೆಗೆ, ‘ಸೋಮಯಾಗ’ ಎಂದರೇನು? ಅದರ ವಿಶೇಷತೆಗಳೇನು? ಎಂದು ಜನರಿಗೆ ತಿಳಿಸಲು ಅವು ಉತ್ಸಾಹ ತೋರಿಸುತ್ತಿವೆ. ಇಂತಹ ಯಾಗದ ಹಿಂದೆ ರಾಜಕಾರಣಿಗಳ ಕೈವಾಡ ಇರುವುದನ್ನು ‘ಪ್ರಜಾವಾಣಿ’ ಹಾಗೂ ಟಿವಿ ವಾಹಿನಿಗಳು ಸೂಚ್ಯವಾಗಿ ಹೇಳುತ್ತಿವೆ.

ಪ್ರಜಾವಾಣಿ ಕಾರ್ಯನಿರ್ವಾಹಕ ಸಂಪಾದಕ ಪದ್ಮರಾಜ್ ದಂಡಾವತಿ.

ಪ್ರಜಾವಾಣಿ ಕಾರ್ಯನಿರ್ವಾಹಕ ಸಂಪಾದಕ ಪದ್ಮರಾಜ್ ದಂಡಾವತಿ.

ಸದ್ಯ ಕರ್ನಾಟಕದ ಮಾಧ್ಯಮದ ಪಾಲಿಗೆ, ಈ ಸುದ್ದಿ ‘ದಿನದ ವಿಶೇಷ’. “ಇದೊಂದು ಜೀವಮಾನದ ವರದಿ,” ಎನ್ನುತ್ತಾರೆ ಪ್ರಜಾವಾಣಿಯ ಕಾರ್ಯನಿರ್ವಾಹಕ ಸಂಪಾದಕ ಪದ್ಮರಾಜ್ ದಂಡಾವತಿ. ಮತ್ತೂರಿನಲ್ಲಿ ನಡೆದ ಸೋಮಯಾಗ ಸುದ್ದಿಯ ಕುರಿತು ‘ಸಮಾಚಾರ’ ಅವರನ್ನು ದೂರವಾಣಿ ಮೂಲಕ ಸಂಪರ್ಕಿಸಿದಾಗ ಅವರು ಸುದ್ದಿ ಸಿಕ್ಕ ಬಗೆ ಹಾಗೂ ಅದನ್ನು ಪ್ರಕಟಿಸಲು ತೆಗೆದುಕೊಂಡ ಸಂಪಾದಕೀಯ ನಿರ್ಧಾರಗಳ ಕುರಿತು ವಿವರವಾಗಿ ಮಾತನಾಡಿದರು.

“ಸುದ್ದಿ ಮೊದಲು ನನಗೆ ತಲುಪಿತು. ಸಂಕೇತಿ ಬ್ರಾಹ್ಮಣ ಸಮುದಾಯದ ಒಬ್ಬರು, ಹೀಗೊಂದು ಯಾಗ ನಡೆದಿದೆ. ಅದನ್ನು ವಿರೊಧಿಸಿ ಒಂದು ಪತ್ರವನ್ನು ಪ್ರಕಟಿಸಬೇಕು ಎಂದು ಹೇಳಿದರು. ಆದರೆ, ನಾವು ಅದನ್ನು ಸುದ್ದಿ ಮಾಡುವುದಾಗಿ ನಿರ್ಧರಿಸಿದೆವು,” ಎಂದರು. ಸೋಮಯಾಗ ನಡೆದ ಹಾಗೂ ಪ್ರಾಣಿಗಳನ್ನು ಬಲಿಕೊಟ್ಟ ಸುದ್ದಿಗಿಂತಲೂ, ‘ಸಂಕೇತಿ ಬ್ರಾಹ್ಮಣ ಸಮುದಾಯದಲ್ಲೇ ತೀವ್ರ ವಿರೋಧ ವ್ಯಕ್ತವಾಗಿದೆ‘ ಎಂಬುದಕ್ಕೆ ಪ್ರಾಮುಖ್ಯತೆ ಯಾಕೆ ಕೊಡಲಾಯಿತು ಎಂಬ ಪ್ರಶ್ನೆಗೆ, “ಬಹುಶಃ ನಮಗೆ ಸುದ್ದಿಯ ಲೀಡ್ ಸಿಕ್ಕಿದ್ದೇ ಸಮುದಾಯದ ವಿರೋಧದ ಮೂಲಕ. ಹೀಗಾಗಿ, ಅದೇ ಸುದ್ದಿಯ ಕೇಂದ್ರ ಬಿಂದುವಾಯಿತು ಅನ್ನಿಸುತ್ತದೆ,” ಎಂದರು.

ಇದನ್ನು ಪಕ್ಕಕ್ಕಿಟ್ಟು ನೋಡಿದರೆ, ವ್ಯಾಪಕವಾಗಿ ಚರ್ಚೆಯಾಗುವಂತಹ ಸುದ್ದಿಯೊಂದು ಹೇಗೆ ಮಾಧ್ಯಮಗಳ ಕಚೇರಿಯನ್ನು ತಲುಪುತ್ತದೆ ಎಂಬುದಕ್ಕೆ ಇದೊಂದು ತಾಜಾ ಉದಾಹರಣೆ.

ಚಂದ್ರಹಾಸ ಹಿರೇಮಳಲಿ

ವರದಿ ಮಾಡಿದ ಪತ್ರಕರ್ತ ಚಂದ್ರಹಾಸ ಹಿರೇಮಳಲಿ.

ಸುದ್ದಿಯು ಪ್ರಜಾವಾಣಿಯ ಶಿವಮೊಗ್ಗ ವರದಿಗಾರ ಚಂದ್ರಹಾಸ ಹಿರೇಮಳಲಿ ಅವರ ಬೈಲೈನ್ನಲ್ಲಿ ಪ್ರಕಟವಾಗಿದೆ. ‘ಸಮಾಚಾರ’ದ ಜತೆ ಮಾತನಾಡಿದ ಅವರು, “ಸುದ್ದಿಯನ್ನು ಮಾಡಲು ಹೊರಟಾಗ ಬಹುತೇಕರು ಸೋಮಯಾಗ ನಡೆದ ಕುರಿತು ಮಾಹಿತಿ ನೀಡುತ್ತಿದ್ದರು. ಆದರೆ, ಅಧಿಕೃತ ಹೇಳಿಕೆ ನೀಡಲು ಹಿಂಜರಿಯುತ್ತಿದ್ದರು. ಸಂಕೇತಿ ಬ್ರಾಹ್ಮಣ ಸಮುದಾಯದಲ್ಲಿ ಯಾಗಕ್ಕೆ ವಿರೋಧ ವ್ಯಕ್ತಪಡಿಸುವವರ ಸಂಖ್ಯೆ ದೊಡ್ಡದಿದೆ. ಆದರೆ ಬಹಿರಂಗವಾಗಿ ಹೇಳಿಕೆ ನೀಡಿದರೆ, ಅವರು ಸಮುದಾಯದ ಜತೆಗೆ ಉಳಿಯುವುದು ಕಷ್ಟ ಎಂಬ ಪರಿಸ್ಥಿತಿ ಇದೆ,” ಎಂದರು.

“ಸುದ್ದಿ ಪ್ರಕಟವಾದ ನಂತರ ಮತ್ತೂರಿನಿಂದಲೂ ಕರೆಗಳು ಬರುತ್ತಿವೆ. ಒಳ್ಳೆಯ ಕೆಲಸ ಮಾಡಿದ್ದೀರಿ ಎನ್ನುತ್ತಿದ್ದಾರೆ. ಆದರೆ ತಮ್ಮನ್ನು ತಾವು ಗುರುತಿಸಿಕೊಳ್ಳಲು ಹಿಂಜರಿಯುತ್ತಿದ್ದಾರೆ,” ಎಂದು ಚಂದ್ರಹಾಸ ಮಾಹಿತಿ ನೀಡುತ್ತಾರೆ.

ಇತ್ತೀಚಿನ ಸುದ್ದಿ ವಾಹಿನಗಳ ಅಬ್ಬರದ ನಡುವೆಯೂ, ಇಂತಹದೊಂದು ಸುದ್ದಿ ಮುದ್ರಣ ಮಾಧ್ಯಮವನ್ನು ಹುಡುಕಿಕೊಂಡು ಹೋಗಿದೆ ಎಂಬುದೇ ಗಮನಾರ್ಹ ಬೆಳವಣಿಗೆ. ಮುಂದಿನ ದಿನಗಳಲ್ಲಿ ದಿನ ಪತ್ರಿಕೆಗಳು ಪೈಪೋಟಿಗಾಗಿಯಾದರೂ, ತಮ್ಮ ‘exclusivity’ ಉಳಿಸಿಕೊಳ್ಳುವ ಅಗತ್ಯವನ್ನು ಇದು ಸಾರಿ ಹೇಳುತ್ತಿದೆ.

“ಪ್ರಜಾವಾಣಿ ಇತ್ತೀಚೆಗೆ ಕಳೆದೆ ಹೋಗಿದೆ ಎನ್ನಿಸುತ್ತಿತ್ತು. ಆದರೆ, ಈ ಸುದ್ದಿಯ ಮೂಲಕ ಮತ್ತೆ ವಿಶ್ವಾಸವನ್ನು ಪುನರ್ ಸ್ಥಾಪಿಸಿದೆ,” ಎನ್ನುತ್ತಾರೆ ಶಿವಮೊಗ್ಗ ಮೂಲದ ವಕೀಲ ಕೆ. ಪಿ. ಶ್ರೀಪಾಲ್. “ಪ್ರಜಾವಾಣಿ ಮೋದಿ ಪ್ರಮಾಣ ವಚನ ಸಮಾರಂಭಕ್ಕೆ ಸಿದ್ದರಾಮಯ್ಯ ಹೋಗದೆ ಇರುವುದನ್ನು ‘ಮಹಾಪ್ರಮಾದ’ ಎಂದು ಸಂಪಾದಕೀಯ ಬರೆದಿತ್ತು. ಇತ್ತೀಚಿನ ದಿನಗಳಲ್ಲಿ ಪತ್ರಿಕೆ ಮೊದಲಿದ್ದ ಕಮಿಟ್ಮೆಂಟ್ ಕಳೆದುಕೊಂಡಿದೆ ಅನ್ನಿಸುವಂತೆ ಮೂಡಿ ಬರುತ್ತಿದೆ,” ಎಂಬುದು ಪ್ರಜಾವಾಣಿ ಓದುಗರಾಗಿರುವ ಪತ್ರಕರ್ತರೊಬ್ಬರ ಅಭಿಪ್ರಾಯ.

“ಇಂತಹ ಮಾತುಗಳು ನಮ್ಮ ವಿರುದ್ಧ ನಡೆಯುತ್ತಿರುವ ಪಿತೂರಿಗಳು ಅಷ್ಟೆ. ನಾವು ಮೋದಿ ಪರವಾಗಿಯೂ ಇಲ್ಲ. ಸಿದ್ದರಾಮಯ್ಯ ಪರವಾಗಿಯೂ ಇಲ್ಲ. ಕರ್ನಾಟಕದಲ್ಲಿ ಸಿದ್ದರಾಮಯ್ಯ ಪರವಾಗಿರುವುದು ಪ್ರಗತಿಶೀಲತೆ ಎಂಬ ಕೆಟ್ಟ ಅಭಿಪ್ರಾಯ ಒಂದು ವರ್ಗದಲ್ಲಿದೆ. ಆದರೆ, ನನ್ನ ಪ್ರಕಾರ ಮಾಧ್ಯಮ ಎಂಬುದು ಯಾವ ಸರಕಾರ ಇದ್ದಾಗಲೂ ವಿರೋಧ ಪಕ್ಷವಾಗಿಯೇ ಕೆಲಸ ಮಾಡಬೇಕು,” ಎಂಬುದು ಪದ್ಮರಾಜ್ ದಂಡಾವತಿಯವರ ನೇರ ಪ್ರತಿಕ್ರಿಯೆ.

ಇವೆಲ್ಲವುಗಳ ಆಚೆಗೆ, ಸಂಕೇತಿ ಬ್ರಾಹ್ಮಣರ ಸೋಮಯಾಗದ ಮೂಲಕ ‘ಪ್ರಜಾವಾಣಿ’ ಸುತ್ತ ಚರ್ಚೆ ಶುರುವಾಗಿದೆ. ಹೊಸ ನಿರೀಕ್ಷೆಗಳು ಹುಟ್ಟಿಕೊಂಡಿವೆ. ಇದನ್ನು ಆಡಳಿತ ಮಂಡಳಿ ಗಮನಿಸಬೇಕಿದೆ.

Top