An unconventional News Portal.

ಷೇರುಪೇಟೆ ಸೂಚ್ಯಂಕ ಕುಸಿತ: ಅತಂತ್ರದಲ್ಲಿ 4.5 ಕೋಟಿ ಕಾರ್ಮಿಕರ ಭವಿಷ್ಯನಿಧಿಯ ಭವಿಷ್ಯ

ಷೇರುಪೇಟೆ ಸೂಚ್ಯಂಕ ಕುಸಿತ: ಅತಂತ್ರದಲ್ಲಿ 4.5 ಕೋಟಿ ಕಾರ್ಮಿಕರ ಭವಿಷ್ಯನಿಧಿಯ ಭವಿಷ್ಯ

ಕಳೆದೊಂದು ವಾರದಿಂದ ಷೇರುಪೇಟೆಯ ಸೂಚ್ಯಂಕ ಕುಸಿತದಿಂದ ಹೂಡಿಕೆದಾರರಿಗೆ ಸುಮಾರು ರೂ.10 ಲಕ್ಷ ಕೋಟಿ ನಷ್ಟ ಉಂಟಾಗಿದೆ. ಜಾಗತಿಕ ಮಾರುಕಟ್ಟೆಯ ಪರಿಣಾಮವಾಗಿ ಈ ಭಾರೀ ಪ್ರಮಾಣದ ಕುಸಿತವನ್ನು ದೇಶದ ಷೇರುಮಾರುಕಟ್ಟೆ ಕಂಡಿದೆ. ಅಮೆರಿಕದಲ್ಲಿ ಷೇರುಗಳ ಬೆಲೆ ಕುಸಿತದ ಪರಿಣಾಮ ಜಾಗತಿಕ ಷೇರು ಮಾರುಕಟ್ಟೆಯ ಮೇಲಾಗಿದೆ ಎನ್ನಲಾಗಿದೆ. ಇದರಿಂದ ಷೇರುಪೇಟೆಯ ಲೆಕ್ಕಾಚಾರದಲ್ಲಿ ಈ ವಾರ ಭಾರೀ ವ್ಯತ್ಯಾಸ ಕಂಡಿದೆ. ಷೇರು ಮಾರುಕಟ್ಟೆಯ ಈ ಕುಸಿತದಿಂದಾಗಿ 4.5 ಕೋಟಿ ಕಾರ್ಮಿಕರ ಭವಿಷ್ಯ ನಿಧಿಯ ಭವಿಷ್ಯವೂ ಅತಂತ್ರದಲ್ಲಿದೆ…

ದೇಶದ 4.5 ಕೋಟಿಗೂ ಹೆಚ್ಚು ಮಂದಿಯ ಭವಿಷ್ಯ ನಿಧಿ ಹಣಯ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆಯಾಗಿದೆ. 4.5 ಕೋಟಿ ಕಾರ್ಮಿಕರ ಭವಿಷ್ಯ ನಿಧಿ ಹಣದಲ್ಲಿ ರೂ. 32 ಸಾವಿರ ಕೋಟಿಗೂ ಹೆಚ್ಚು ಮೊತ್ತವನ್ನು ಕಾರ್ಮಿಕ ಭವಿಷ್ಯ ನಿಧಿ ಸಂಘಟನೆ (ಇಪಿಎಫ್ಓ) ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿದೆ. ಷೇರು ಮಾರುಕಟ್ಟೆಯ ಏರಿಳಿತ ಕಾರ್ಮಿಕರ ದುಡಿಮೆಯ ಭಾಗವಾದ ಈ ಹಣದ ಮೇಲಾಗುತ್ತಿದೆ. ನಷ್ಟದ ಹಣದಲ್ಲಿ ಕಾರ್ಮಿಕರ ಭವಿಷ್ಯ ನಿಧಿಯ ಬೆವರಿನ ಹಣವೂ ಸೇರಿದೆ. ಕೇಂದ್ರ ಸರ್ಕಾರವನ್ನು ನಂಬಿದ್ದ ಕಾರ್ಮಿಕರ ಹಣ ಷೇರು ಮಾರುಕಟ್ಟೆಯ ತಲ್ಲಣದ ನಷ್ಟದ ಬಾಬತ್ತಿನಲ್ಲಿ ಸೇರಿ ಹೋಗುತ್ತಿದೆ. ಆದರೆ, ಕಾರ್ಮಿಕರ ಭವಿಷ್ಯ ನಿಧಿಯ ಹಣ ಷೇರು ಮಾರುಕಟ್ಟೆಯ ನಷ್ಟದಲ್ಲಿ ಕರಗಿ ಹೋಗುವುದನ್ನು ತಡೆಯುವ ಬಗ್ಗೆ ಕೇಂದ್ರ ಸರ್ಕಾರ ಈವರೆಗೆ ತುಟಿ ಬಿಚ್ಚಿಲ್ಲ.

ಕೇಂದ್ರ ಸರ್ಕಾರ 2016ರ ಫೆಬ್ರುವರಿಯಲ್ಲಿ ಹೊಸ ಇಪಿಎಫ್ ನೀತಿಯನ್ನು ಜಾರಿಗೊಳಿಸಿತ್ತು. ಇಪಿಎಫ್‌ ನಿಧಿಯಲ್ಲಿರುವ ಹಣವನ್ನು ಹಿಂಪಡೆಯುವ ವಯೋಮಿತಿಯನ್ನು ಏರಿಕೆ ಮಾಡಲಾಗಿತ್ತು. ಅಲ್ಲದೆ ಕಾರ್ಮಿಕರು ಕೆಲಸ ಬಿಟ್ಟ ನಂತರ ಎರಡು ತಿಂಗಳು ಉದ್ಯೋಗದಲ್ಲಿ ಇಲ್ಲದೆ ಇದ್ದರೆ ಇಪಿಎಫ್‌ ಹಣವನ್ನು ಹಿಂಪಡೆಯುವ ಅವಕಾಶದ ಮೇಲೆ ನಿರ್ಬಂಧ ಹೇರಲಾಗಿತ್ತು. ಈ ಹೊಸ ಇಪಿಎಫ್‌ ನೀತಿಯನ್ನು ವಿರೋಧಿಸಿ ಕಾರ್ಮಿಕ ಸಂಘಟನೆಗಳು ದೊಡ್ಡ ಪ್ರಮಾಣದ ಪ್ರತಿಭಟನೆ ನಡೆಸಿದ್ದವು. ಬೆಂಗಳೂರಿನಲ್ಲಿ ಗಾರ್ಮೆಂಟ್ಸ್‌ ನೌಕರರು ಬೀದಿಗಿಳಿದು ಕೇಂದ್ರದ ಈ ನೀತಿಯ ವಿರುದ್ಧ ಬೃಹತ್ ಪ್ರತಿಭಟನೆ ಮಾಡಿದ್ದರು. ಗಾರ್ಮೆಂಟ್ಸ್ ನೌಕರರ ಪ್ರತಿಭಟನೆ ವೇಳೆ ಪೊಲೀಸರು ಮಹಿಳಾ ಕಾರ್ಮಿಕರ ಮೇಲೆ ಲಾಠಿ ಪ್ರಹಾರ ನಡೆಸಿದ್ದು ಹಾಗೂ ಪುರುಷ ಪೊಲೀಸ್‌ ಸಿಬ್ಬಂದಿ ಮಹಿಳೆಯರೊಂದಿಗೆ ಅನುಚಿತವಾಗಿ ನಡೆದುಕೊಂಡಿದ್ದು ಪ್ರತಿಭಟನೆ ಹಿಂಸಾಚಾರದ ಸ್ವರೂಪ ಪಡೆಯಲು ಕಾರಣವಾಗಿತ್ತು. ಬೆಂಗಳೂರು ಸೇರಿದಂತೆ ದೇಶದ ಹಲವು ಕಡೆ ಹೊಸ ಇಪಿಎಫ್‌ ನೀತಿ ವಿರೋಧಿಸಿ ಕಾರ್ಮಿಕರು ನಡೆಸಿದ ಬೃಹತ್ ಪ್ರತಿಭಟನೆಗೆ ಮಣಿದಿದ್ದ ಕೇಂದ್ರ ಸರ್ಕಾರ ಹೊಸ ನೀತಿಯನ್ನು ಕೈಬಿಟ್ಟು ಹಳೆಯ ಇಪಿಎಫ್‌ ವ್ಯವಸ್ಥೆಯನ್ನೇ ಮುಂದುವರಿಸಿತ್ತು.

ಕಾರ್ಮಿಕರ ಭವಿಷ್ಯ ನಿಧಿಯ ಹಣವನ್ನು ಇಪಿಎಫ್ಓ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುವ ಪರಿಪಾಠ ಹೊಸದೇನೂ ಅಲ್ಲ. 2015ರಿಂದ ಭವಿಷ್ಯ ನಿಧಿ ಹಣವನ್ನು ಇಪಿಎಫ್‌ಓ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುತ್ತಾ ಬಂದಿದೆ. ಆರಂಭದಲ್ಲಿ ಭವಿಷ್ಯ ನಿಧಿಯ ಒಟ್ಟು ಹಣದ ಶೇಕಡ 5ರಷ್ಟನ್ನು ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಲಾಗಿತ್ತು. 2017-18ರಲ್ಲಿ ಈ ಮಿತಿಯನ್ನು ಶೇಕಡ 15ಕ್ಕೆ ವಿಸ್ತರಿಸಲು ಕೇಂದ್ರ ಹಣಕಾಸು ಇಲಾಖೆ ಇಪಿಎಫ್ಓಗೆ ಅನುಮತಿ ನೀಡಿದೆ. ಹೀಗಾಗಿ ರೂ. 1 ಲಕ್ಷ ಕೋಟಿಗೂ ಹೆಚ್ಚಿರುವ ಕಾರ್ಮಿಕರ ಭವಿಷ್ಯ ನಿಧಿಯ ಹಣದಲ್ಲಿ ರೂ. 22 ಸಾವಿರ ಕೋಟಿ ಹಣವನ್ನು ಇಪಿಎಫ್ಓ 2017-18ರ ಸಾಲಿನಲ್ಲಿ ಷೇರುಪೇಟೆಯಲ್ಲಿ ಹೂಡಿಕೆ ಮಾಡಿದೆ. ಈ ಹೂಡಿಕೆಗೆ ಪ್ರತಿಯಾಗಿ ವಿನಿಮಯ ವಹಿವಾಟು ನಿಧಿಯಡಿ (ಇಟಿಎಫ್) ಶೇಕಡ 22ರಷ್ಟು ವಾರ್ಷಿಕ ಆದಾಯವನ್ನು ಇಪಿಎಫ್ಓ ನಿರೀಕ್ಷಿಸಿತ್ತು.

ಇಪಿಎಫ್‌ಓ 2015-16ರಲ್ಲಿ ರೂ. 6,577 ಕೋಟಿ ಮತ್ತು 2016-17ರಲ್ಲಿ ರೂ. 14,982 ಕೋಟಿಯನ್ನು ಷೇರುಪೇಟೆಯಲ್ಲಿ ಹೂಡಿಕೆ ಮಾಡಿತ್ತು. ಈ ಹೂಡಿಕೆಗೆ ರೂ. 234.86 ಕೋಟಿ ಲಾಭಾಂಶವನ್ನು ಇಪಿಎಫ್‌ಓ ಪಡೆದಿದೆ. ಆದರೆ, ಹೂಡಿಕೆಯನ್ನು ಶೇಕಡ 15ಕ್ಕೆ ಹೆಚ್ಚಿಸಿದ ಬಳಿಕ ಷೇರು ಮಾರುಕಟ್ಟೆಯಲ್ಲಿ ಕಂಡುಬಂದಿರುವ ಈ ಸೂಚ್ಯಂಕ ಕುಸಿತ ಕಾರ್ಮಿಕರ ಭವಿಷ್ಯ ನಿಧಿ ಹಣಕ್ಕೆ ಮಾರಕವಾಗುವ ಸಾಧ್ಯತೆ ಇದೆ. ರೂ. 32 ಸಾವಿರ ಕೋಟಿಗೂ ಹೆಚ್ಚಿರುವ ಕಾರ್ಮಿಕರ ಭವಿಷ್ಯ ನಿಧಿಯ ಹಣದಲ್ಲಿ ಎಷ್ಟು ಹಣ ಷೇರುಪೇಟೆಯ ಸೂಚ್ಯಂಕ ಕುಸಿತದಿಂದ ನಷ್ಟಕ್ಕೆ ತುತ್ತಾಗಿದೆ ಎಂಬ ಅಂಕಿಸಂಖ್ಯೆ ಸದ್ಯಕ್ಕೆ ಲಭ್ಯವಾಗಿಲ್ಲ.

ಕಾರ್ಮಿಕರ ಭವಿಷ್ಯ ನಿಧಿ ಹಣದ ಶೇಕಡ 15ರಷ್ಟನ್ನು ಷೇರು ಮಾರುಕಟ್ಟೆಯಲ್ಲಿ ಹೂಡಲು ಇಪಿಎಫ್ಓ ಮುಂದಾಗಿದ್ದೇ ಅಪಾಯಕಾರಿ. “ಸರ್ಕಾರಿ ಸ್ವಾಮ್ಯದ ಸಂಸ್ಥೆಗಳು ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುವ ಮುನ್ನಾ ಅಲ್ಲಿನ ಅನಿಶ್ಚಿತತೆಯನ್ನು ಗಮನದಲ್ಲಿಟ್ಟುಕೊಳ್ಳುವುದು ಮುಖ್ಯ. ಇಪಿಎಫ್‌ಓ ಕಾರ್ಮಿಕರ ಭವಿಷ್ಯ ನಿಧಿಯ ಹಣದ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಳ್ಳಬೇಕಾಗಿತ್ತು. ಕಳೆದ ಮೂರು ವರ್ಷದಲ್ಲಿ ಷೇರು ಮಾರುಕಟ್ಟೆ ಸ್ಥಿತಿ ಚೆನ್ನಾಗಿಯೇ ಇದೆ. ಸೂಚ್ಯಂಕದ ಏರಿಕೆ ಹಾಗೂ ಕುಸಿತ ಷೇರು ಮಾರುಕಟ್ಟೆಯಲ್ಲಿ ಸಾಮಾನ್ಯ. ಆದರೆ, ಷೇರು ಮಾರುಕಟ್ಟೆಯ ಸ್ಥಿತಿ ಚೆನ್ನಾಗಿದೆ ಎಂಬ ಕಾರಣಕ್ಕೆ ಇಪಿಎಫ್‌ಓ ಹೂಡಿಕೆಯನ್ನು ಶೇಕಡ 5ರಿಂದ 15ಕ್ಕೆ ಹೆಚ್ಚಿಸಿದ್ದು ಸರಿಯಲ್ಲ. ಜನರ ದುಡಿಮೆಯ ದುಡ್ಡನ್ನು ಷೇರು ಮಾರುಕಟ್ಟೆಯ ಅನಿಶ್ಚಿತತೆಗೆ ಒಡ್ಡುವುದು ಸರಿಯಲ್ಲ” ಎಂಬುದು ಷೇರು ಮಾರುಕಟ್ಟೆ ವಿಶ್ಲೇಷಕ ಶ್ರೀಕಂಠ ಅವರ ಮಾತು.

“ಷೇರು ಮಾರುಕಟ್ಟೆಯ ವ್ಯವಹಾರಗಳು ಬೇಡಿಕೆ- ಪೂರೈಕೆಯ ಜೂಟಾಟದಂತೆ ನಡೆಯುತ್ತಿರುತ್ತವೆ. ಹೂಡಿಕೆದಾರರು ಅಗತ್ಯಕ್ಕೆ ತಕ್ಕಂತೆ ತಮ್ಮ ವಹಿವಾಟನ್ನು ಷೇರು ಖರೀದಿ- ಮಾರಾಟದಲ್ಲಿ ಹೆಚ್ಚು ಕಡಿಮೆ ಮಾಡುತ್ತಿರುತ್ತಾರೆ. ಹೀಗಾಗಿ ಮಾರುಕಟ್ಟೆ ಹೀಗೆಯೇ ಇರುತ್ತದೆ ಎಂಬ ಲೆಕ್ಕಾಚಾರ ಹಾಕುವುದು ಷೇರುಪೇಟೆ ವಿಷಯದಲ್ಲಿ ಮೂರ್ಖತನವೂ ಆಗಬಬಹುದು. ಆದರೆ, ಕಾರ್ಮಿಕರ ಭವಿಷ್ಯ ನಿಧಿಯ ಹಣವನ್ನು ಇಪಿಎಫ್‌ಓ ಇಂತಹ ಅಭದ್ರ ಪೇಟೆಯಲ್ಲಿ ಹೂಡಿಕೆ ಮಾಡಲು ಮುಂದಾಗಿದ್ದೇ ತಪ್ಪು. ಇದನ್ನು ನಿಯಂತ್ರಿಸಬೇಕಾಗಿದ್ದ ಹಣಕಾಸು ಇಲಾಖೆ ಹೂಡಿಕೆಯನ್ನು ಭವಿಷ್ಯ ನಿಧಿಯ ಒಟ್ಟು ಹಣದ ಶೇಕಡ 5ರಿಂದ ಶೇಕಡ 15ರವರೆಗೆ ಹೆಚ್ಚಿಸಲು ಅನುಮತಿ ನೀಡಿದ ಕ್ರಮವೇ ಸರಿಯಲ್ಲ. ಈ ಮೂಲಕ ಹಣಕಾಸು ಇಲಾಖೆ ಮತ್ತು ಇಪಿಎಫ್‌ಓ ಕಾರ್ಮಿಕರ ದುಡಿಮೆಯ ಹಣದೊಂದಿಗೆ ಚೆಲ್ಲಾಟವಾಡುತ್ತಿವೆ” ಎನ್ನುತ್ತಾರೆ ಅವರು.

“ಇಪಿಎಫ್‌ಓ ಹೂಡಿಕೆ ಮಾಡಬೇಕೆಂದಿದ್ದರೆ ಷೇರು ಮಾರುಕಟ್ಟೆ ಬಿಟ್ಟು ಹಲವು ಆಯ್ಕೆಗಳಿದ್ದವು. ಷೇರು ಮಾರುಕಟ್ಟೆಗೆ ಹೂಡಿಕೆ ಮಾಡಿದಷ್ಟು ಹಣವನ್ನು ಸರ್ಕಾರದ ಮೂಲಸೌಕರ್ಯ ಯೋಜನೆಗಳ ಮೇಲೆ ಹೂಡಿಕೆ ಮಾಡಲು ಇಪಿಎಫ್‌ಓ ಪ್ರಯತ್ನಿಸಬಹುದಿತ್ತು. ಕಾರ್ಮಿಕರ ಭವಿಷ್ಯ ನಿಧಿ ಹಣದ ಸುರಕ್ಷತೆ ಹಾಗೂ ದೂರದೃಷ್ಟಿಯಿಂದ ಹೂಡಿಕೆ ಮಾಡುವ ಯತ್ನವನ್ನು ಇಪಿಎಫ್‌ಓ ಮಾಡಬೇಕು. ಇಲ್ಲವೇ ಹೂಡಿಕೆಗಳಿಂದ ದೂರ ಉಳಿಯುವುದೇ ಒಳ್ಳೆಯದು. ಕೊನೆಗೆ ಕಾರ್ಮಿಕರ ಹಣದ ಸುರಕ್ಷತೆಯೇ ಸರ್ಕಾರಿ ಸಂಸ್ಥೆಗಳ ಆದ್ಯತೆಯಾಗಬೇಕು” ಎಂಬುದು ಅವರ ಮಾತು.

ಷೇರುಪೇಟೆ ಭಾರೀ ಕುಸಿತವನ್ನು ನೋಡಿರುವ ಇಪಿಎಫ್‌ಓ ಕಾರ್ಮಿಕರ ಭವಿಷ್ಯ ನಿಧಿಯ ಹಣದ ಸುರಕ್ಷತೆಗೆ ಯಾವ ಕ್ರಮ ಕೈಗೊಳ್ಳಲಿದೆ, ಹೂಡಿಕೆ ಹಿಂತೆಗೆತ ಅಥವಾ ಹೂಡಿಕೆ ಕಡಿತಕ್ಕೆ ಮುಂದಾಗಲಿದೆಯೇ ಎಂಬುದಕ್ಕೆ ಸದ್ಯಕ್ಕಂತೂ ಉತ್ತರವಿಲ್ಲ. ಕಾರ್ಮಿಕರ ಬೆವರಿನ ರೂ. 32 ಸಾವಿರ ಕೋಟಿಯ ಸುರಕ್ಷತೆಯ ಬಗ್ಗೆ ಇಪಿಎಫ್‌ಓ ಏನು ಕ್ರಮ ಕೈಗೊಳ್ಳುತ್ತದೆ ಎಂಬುದು ಮುಖ್ಯ. ಕಾರ್ಮಿಕರ ದುಡಿಮೆಯ ಹಣಕ್ಕೆ ಇಪಿಎಫ್‌ಓ ಭದ್ರತೆ ಒದಗಿಸದಿದ್ದರೆ ಕಾರ್ಮಿಕರು ಮತ್ತೊಮ್ಮೆ ಬೀದಿಗಿಳಿದು ಬೃಹತ್‌ ಪ್ರತಿಭಟನೆ ನಡೆಸುವ ಸಾಧ್ಯತೆಯನ್ನಂತೂ ಅಲ್ಲಗಳೆಯುವಂತಿಲ್ಲ.

Leave a comment

Top