An unconventional News Portal.

‘ಬೌದ್ಧ ದೇಶದ ಅಲ್ಪಸಂಖ್ಯಾತರು’: ರೋಹಿಂಗ್ಯಾ ಮುಸ್ಲಿಂರು, ಧರ್ಮ ಮತ್ತು ಮಿತಿ ಮೀರಿದ ದಾಳಿಗಳು…

‘ಬೌದ್ಧ ದೇಶದ ಅಲ್ಪಸಂಖ್ಯಾತರು’: ರೋಹಿಂಗ್ಯಾ ಮುಸ್ಲಿಂರು, ಧರ್ಮ ಮತ್ತು ಮಿತಿ ಮೀರಿದ ದಾಳಿಗಳು…

1920-40ರಲ್ಲಿ ದೇಶಗಳ ನಡುವೆ ಯುದ್ಧಗಳು ನಡೆದು ಮಹಾಸಮರಗಳು ನಡೆದು ಹೋಗಿದ್ದವು. ಆದರೆ ಇವತ್ತು ದೇಶಗಳ ಗಡಿಯನ್ನು ಮೀರಿ ಮನುಷ್ಯನ ನಡುವೆ ನಡೆಯುತ್ತಿರುವ ಯುದ್ಧಗಳು ಧಾರ್ಮಿಕ ನೆಲೆಗೆ ಅಪ್ಪಿಕೊಳ್ಳುತ್ತಿವೆ. ಸದ್ಯ ವಿಶ್ವದಲ್ಲಿ ನಡೆಯುತ್ತಿರುವುದು ಜನಾಂಗಗಳ ನಡುವಿನ ಯುದ್ಧ. ಅದು ಹಿಂದೂ ವರ್ಸಸ್ ಮುಸ್ಲಿಂ ಇರಬಹುದು, ಮುಸ್ಲಿಂ ವರ್ಸಸ್ ಕ್ರಿಶ್ಚಿಯನ್ ಇರಬಹುದು ಅಥವಾ ನಮ್ಮದೇ ಪಕ್ಕದ ದೇಶ ಮಯನ್ಮಾರ್‌ನಲ್ಲಿ ನಡೆಯುತ್ತಿರುವ ಬೌದ್ಧಿಸ್ಟ್ ವರ್ಸಸ್ ರೊಹಿಂಗ್ಯಾ ಇರಬಹುದು.

ನಿಲ್ಲದ ರೊಹಿಂಗ್ಯಾ ಮುಸ್ಲಿಮರ ಮೇಲಿನ ದಾಳಿ… ಮಯನ್ಮಾರ್ ಭೇಟಿ ವೇಳೆ ರೋಹಿಂಗ್ಯಾ ವಿಷಯ ಪ್ರಸ್ತಾಪಿಸಲಿರುವ ಪ್ರಧಾನಿ ನರೇಂದ್ರ ಮೋದಿ… ಭಾರತದಲ್ಲಿರುವ ರೊಹಿಂಗ್ಯಾ ಮುಸ್ಲಿಮರನ್ನು ಗಡಿಪಾರು ಮಾಡಲು ಸೂಚನೆ… 73 ಸಾವಿರ ರೊಹಿಂಗ್ಯಾ ಮುಸ್ಲಿಮರ ವಲಸೆ… ಭಾರತ ರೋಹಿಂಗ್ಯಾ ಮುಸ್ಲಿಮರಿಗೆ ಆಶ್ರಯ ನೀಡಬೇಕು

ಹೀಗೆ ರೋಹಿಂಗ್ಯಾ ಎಂಬ ಪದ ಪದೇ ಪದೇ ಕಿವಿ ಮೇಲೆ ಇತ್ತೀಚೆಗೆ ಬೀಳುತ್ತಿದೆ. ಸದ್ಯಕ್ಕೆ ಸಿರಿಯಾ ಮತ್ತು ಮಧ್ಯ ಪೂರ್ವ ದೇಶಗಳ ಹ್ಯುಮನಿಟೇರಿಯನ್ ಕ್ರೈಸಿಸ್ (ಮಾನವೀಯ ಬಿಕ್ಕಟ್ಟು) ರೀತಿಯಲ್ಲಿಯೇ ಏಷಿಯಾದಲ್ಲಿನ ಬಿಕ್ಕಟ್ಟಿನ ಮೂಲದಲ್ಲಿ ಇರುವವರು ಈ ರೊಹಿಂಗ್ಯಾ. ಹಾಗಾದರೆ ಯಾರಿವರು ರೊಹಿಂಗ್ಯಾ ಮುಸ್ಲಿಮರು? ಇವರು ಎಲ್ಲಿಯವರು? ಈಗೇಕೆ ನಿರಾಶ್ರಿತರಾಗಿದ್ದಾರೆ? ಅಸ್ಥಿತ್ವಕ್ಕಾಗಿ ಅವರು ನಡೆಸುತ್ತಿರುವ ಹೋರಾಟ ಹೇಗಿದೆ? ಭಾಷೆಯನ್ನು ಉಳಿಸಿಕೊಳ್ಳಲು ಹೇಗೆ ಬಡಿದಾಡುತ್ತಿದ್ದಾರೆ?

ಉತ್ತರ ಈ ವರದಿಯಲ್ಲಿದೆ.

ಯಾರಿವರು ರೊಹಿಂಗ್ಯಾ ಮುಸ್ಲಿಮರು?

ರೊಹಿಂಗ್ಯಾ ಮುಸ್ಲಿಮರು ಬೌದ್ಧ ಧರ್ಮ ಪ್ರತಿಪಾದಿಸುವ ಮಯನ್ಮಾರ್ (ಹಿಂದಿನ ಬರ್ಮಾ) ದೇಶದಲ್ಲಿ ಶತಮಾನಗಳಿಂದ ವಾಸಿಸುತ್ತಿದ್ದಾರೆ. ವಿಶ್ವದಲ್ಲಿ ಅತೀ ಹೆಚ್ಚು ದೌರ್ಜನ್ಯಕೊಳ್ಳಗಾದ ಅಲ್ಪಸಂಖ್ಯಾತ ಸಮುದಾಯ ಎಂದು ಇದನ್ನು ಗುರುತಿಸುತ್ತಾರೆ. ಮಯನ್ಮಾರ್ ಸೇರಿದಂತೆ ಇವತ್ತಿಗೆ ಒಟ್ಟಾರೆ ಏಷ್ಯಾದಲ್ಲಿ 1.1 ಕೋಟಿ ರೊಹಿಂಗ್ಯಾ ಸಮುದಾಯದ ಮುಸ್ಲಿಮರಿದ್ದಾರೆ.

ಮಯನ್ಮಾರ್‌ನ ರಖಿನೆ ರಾಜ್ಯದಲ್ಲಿ ವಾಸಿಸುವ ಇವರದ್ದು ರೊಹಿಂಗ್ಯಾ ಅಥವಾ ರೊಯಿಗ್ಯಾ ಮಾತೃ ಭಾಷೆ. ಮಯನ್ಮಾರ್‌ನಲ್ಲಿ 135ಜನಾಂಗೀಯ ಗುಂಪುಗಳಿದ್ದು ಅದರಲ್ಲಿ ಈ ರೋಹಿಂಗ್ಯಾವೂ ಒಂದು ಎಂಬುದನ್ನು ಅಲ್ಲಿನ ಸರಕಾರ ಒಪ್ಪಿಕೊಳ್ಳುತ್ತಿಲ್ಲ. ಈ ಕಾರಣಕ್ಕೆ 1948ರಿಂದಲೇ ರೊಹಿಂಗ್ಯಾ ಸಮುದಾಯದವರಿಗೆ ಪೌರತ್ವ ನಿರಾಕರಿಸುತ್ತಲೇ ಬರಲಾಗುತ್ತಿದೆ. ಹೀಗಾಗಿ ಸದ್ಯಕ್ಕೆ ಇವರು ತುಂಡು ಭೂಮಿಯೂ ಇಲ್ಲದ ನಿರಾಶ್ರಿತ ಜನ.

ಸದ್ಯಕ್ಕೆ ತಾತ್ಕಾಲಿಕ ನೆಲೆಯಲ್ಲಿ ಮಯನ್ಮಾರ್‌ನ ಪಶ್ಚಿಮ ತೀರ ರಾಜ್ಯ ರಖಿನೆಯಲ್ಲಿ ಹೆಚ್ಚಿನ ರೋಹಿಂಗ್ಯಾ ಜನರು ವಾಸವಾಗಿದ್ದಾರೆ. ಇಡೀ ಮಯನ್ಮಾರ್‌ನ ಅತ್ಯಂತ ಕಡು ಬಡತನದ ರಾಜ್ಯ ಇದು. ಇಲ್ಲಿ ಈ ಸಮುದಾಯದವರಿಗೆ ಯಾವುದೇ ಮೂಲಭೂತಸೌಕರ್ಯವಾಗಲಿ, ಸರಕಾರದ ಸೌಲಭ್ಯಗಳಾಗಲಿ ಇಲ್ಲ. ಜತೆಗೆ ಕಠಿಣ ಪ್ರತಿಬಂಧಕ ನಿಯಮಗಳು ಬೇರೆ. ಇವರು ಇಲ್ಲಿಂದ ಎಲ್ಲಿಗೇ ಹೋಗಬೇಕೆಂದರೂ ಅದಕ್ಕೆ ಅಲ್ಲಿನ ಸರಕಾರದ ಅನುಮತಿ ಕಡ್ಡಾಯ.

ಸ್ವಾತಂತ್ರ್ಯದ ಬೆನ್ನಿಗೆ ಪೌರತ್ವದ ಸಮಸ್ಯೆ:

ಇತಿಹಾಸದ ಪುಟ ತಿರುವಿದರೆ ರೊಹಿಂಗ್ಯಾ ಜನರು 12ನೇ ಶತಮಾನದಿಂದ ಮಯನ್ಮಾರ್ ಪ್ರದೇಶದಲ್ಲಿ ವಾಸವಿದ್ದರು ಎಂಬ ದಾಖಲೆಗಳು ಸಿಗುತ್ತವೆ.

ಆದರೆ, ಇದಕ್ಕೆ ತದ್ವಿರುದ್ಧ ವಾದವೂ ಇದೆ. ಅದು ರೊಹಿಂಗ್ಯಾ ಜನರು ಭಾರತ ಮತ್ತು ಬಾಂಗ್ಲಾದೇಶದಿಂದ ವಲಸೆ ಬಂದವರು ಎಂಬುದು. 1824ರಿಂದ 1948ರವರೆಗೆ ಬ್ರಿಟೀಷರು ಮಯನ್ಮಾರನ್ನು ಭಾರತದ ಒಂದು ಪ್ರಾಂತ್ಯವೆಂದೇ ಆಳುತ್ತಿದ್ದರು. ಈ ಸಂದರ್ಭ ಭಾರತ ಮತ್ತು ಬಾಂಗ್ಲಾದೇಶದಿಂದ ಒಂದಷ್ಟು ಕಾರ್ಮಿಕರನ್ನು ಮಯನ್ಮಾರಿಗೆ ಬ್ರಟೀಷರು ಕರೆದೊಯ್ದಿದ್ದರು. ಅವರೇ ರೋಹಿಂಗ್ಯಾ ಜನ. ಮುಂದೆ ಮಯನ್ಮಾರ್ಗೆ 1948ರಲ್ಲಿ ಬ್ರಿಟೀಷರಿಂದ ಸ್ವಾತಂತ್ರ್ಯ ಸಿಕ್ಕಿದರೂ, ಈ ರೋಹಿಂಗ್ಯಾ ಜನರನ್ನು ಅಲ್ಲಿನ ಜನ ಎಂದು ಸರಕಾರ ಒಪ್ಪಿಕೊಳ್ಳಲು ಸಿದ್ದವಿರಲಿಲ್ಲ. ಬದಲಿಗೆ ಇವರನ್ನು ‘ಬೆಂಗಾಲಿ’ಗಳು ಎಂದು ಪೌರತ್ವ ನಿರಾಕರಿಸಲಾಯಿತು.

ಮುಳುವಾದ ‘ಸೇನಾ ಕ್ರಾಂತಿ’:

1948ರಲ್ಲಿ ಸ್ವತಂತ್ರ ಮಯನ್ಮಾರ್ ರಚನೆಯಾದ ನಂತರ ಯಾವ ಸಮುದಾಯಗಳಿಗೆ ಪೌರತ್ವ ನೀಡಬೇಕು ಎಂಬ ನಿಯಮ ಜಾರಿಗೆ ತಂದಾಗ ರೋಹಿಂಗ್ಯಾ ಸಮುದಾಯವನ್ನು ಹೊರಗಿಡಲಾಯಿತು. ಹೀಗಿದ್ದೂ ಎರಡು ತಲೆಮಾರುಗಳನ್ನು ಮಯನ್ಮಾರ್‌ನಲ್ಲಿ ಕಳೆದ ರೊಹಿಂಗ್ಯಾ ಜನರಿಗೆ ಪೌರತ್ವ ನೀಡುವ ನೀತಿ ಜಾರಿಗೆ ಬಂತು. ಈ ಅವಧಿಯಲ್ಲಿ ರೊಹಿಂಗ್ಯಾ ಸಮುದಾಯದವರು ಸಂಸತ್ತಿಗೂ ಪ್ರವೇಶ ಪಡೆದಿದ್ದರು. ಆದರೆ ಇವರಿಗೆ ಮುಳುವಾಗಿದ್ದು ನಂತರದ ದಿನಗಳಲ್ಲಿ ನಡೆದ ಸೇನಾ ಕ್ರಾಂತಿ.

1962ರಲ್ಲಿ ದೇಶದಲ್ಲಿ ನಡೆದ ಸೇನಾ ಕ್ರಾಂತಿ ರೋಹಿಂಗ್ಯಾ ಪಾಲಿಗೆ ಮರಣ ಶಾಸನ ಬರೆಯಿತು. ರಾಷ್ಟ್ರೀಯ ನೋಂದಣಿ ಪತ್ರಗಳನ್ನು ಸೇನೆ ಜಾರಿಗೆ ತಂದಿತು. ರೋಹಿಂಗ್ಯಾ ಸಮುದಾಯಗಳಿಗೆ ಈ ಗುರುತು ಪತ್ರ ನಿರಾಕರಿಸಲಾಯಿತು. ಕೇವಲ ‘ವಿದೇಶಿ ಗುರುತು ಪತ್ರ’ಗಳನ್ನು ಅವರಿಗೆ ನೀಡಲಾಯಿತು. ಈ ಮೂಲಕ ಉದ್ಯೋಗ, ಶಿಕ್ಷಣ ಮೊದಲಾದ ಕ್ಷೇತ್ರಗಳಿಂದ ರೋಹಿಂಗ್ಯಾ ಜನರನ್ನು ಹೊರಗಿಡಲಾಯಿತು.

ಮುಂದೆ 1982ರಲ್ಲಿ ಮತ್ತೊಮ್ಮೆ ಹೊಸ ಪೌರತ್ವ ಕಾಯಿದೆಗಳನ್ನು ದೇಶದಲ್ಲಿ ಜಾರಿಗೆ ತರಲಾಯಿತು. ಇದು ಬಿಕ್ಕಟ್ಟನ್ನು ಮತ್ತಷ್ಟು ವಿಸ್ತರಿಸಿತು. ಶಿಕ್ಷಣ, ಉದ್ಯೋಗ ಮಾತ್ರವಲ್ಲದೆ ಈ ಬಾರಿ ಮದುವೆ, ಪ್ರಯಾಣ, ಧಾರ್ಮಿಕ ಸ್ವಾತಂತ್ರ್ಯ, ಆರೋಗ್ಯ ಸೇವೆಯಂಥ ಪ್ರಮುಖ ಸೇವೆಗಳನ್ನು ಪಡೆಯುವುದನ್ನೇ ರೋಹಿಂಗ್ಯಾ ಜನರ ಪಾಲಿಗೆ ನಿರ್ಬಂಧಿಸಲಾಯಿತು.

ಈ ನಿಯಮಗಳು ಜಾರಿಗೆ ಬರುವ ಮೊದಲೇ ಅಂದರೆ 1970ರ ಸುಮಾರಿಗೇ ರೋಹಿಂಗ್ಯಾ ಜನರು ಪಕ್ಕದ ಬಾಂಗ್ಲಾದೇಶ, ಮಲೇಷ್ಯಾ, ಥಾಯ್ಲಾಂಡ್ ಮತ್ತು ದಕ್ಷಿಣ ಪೂರ್ವಾ ದೇಶಗಳತ್ತ ವಲಸೆ ಹೋಗಲು ಆರಂಭಿಸಿದ್ದರು. ಯಾವಾಗ ಈ ಕಾನೂನು ಜಾರಿಗೆ ಬಂತೋ ವಲಸೆ ಮತ್ತಷ್ಟು ಹೆಚ್ಚಾಯಿತು.

ಈ ಎಲ್ಲಾ ವಲಸೆ ಪ್ರಯತ್ನಗಳ ಸಂದರ್ಭ ಜನರು ಅತ್ಯಾಚಾರ, ಕೊಲೆ, ದೌರ್ಜನ್ಯ, ಹಿಂಸೆಗಳನ್ನು ಎದುರಿಸಿದರು. ಇವೆಲ್ಲದರ ಗೊಡವೆಯೇ ಬೇಡ ಎಂದು ವಲಸೆ ಹೋಗದೆ ಮಯನ್ಮಾರ್ ನೆಲೆದಲ್ಲೇ ನೆಲೆ ನಿಂತಿದ್ದ ಉಳಿದ ರೋಹಿಂಗ್ಯಾ ಜನರ ಮೇಲೆ ಮಲೇಷ್ಯಾ ಸರಕಾರ ಮುಗಿಬಿದ್ದಿದ್ದು 2016ರ ಅಕ್ಟೋಬರ್ ನಂತರ.

rohingya-2ದಾಳಿಯ ತಿರುವು, ನಿರಾಶ್ರಿತರಾದ ರೋಹಿಂಗ್ಯಾ ಜನ:

ಅಕ್ಟೋಬರ್ 2016 ರಲ್ಲಿ ಮಯನ್ಮಾರ್‌ನ ಆರು ಗಡಿ ಭದ್ರತಾ ಪಡೆಯ ಪೊಲೀಸರು ಕೊಲ್ಲಲ್ಪಟ್ಟರು. ಇವರನ್ನು ಕೊಂದಿದ್ದು ರೋಹಿಂಗ್ಯಾದ ಶಸಸ್ತ್ರ ಗುಂಪು ಎಂದು ವಾದಿಸಿದ ಸರಕಾರ ರೋಹಿಂಗ್ಯಾ ಜನರ ಮನೆಗಳ ಮೇಲೆ ಮುಗಿಬಿತ್ತು. ಈ ಸಂದರ್ಭದಲ್ಲಿ ಸೇನೆಯಿಂದ ನಡೆದ ಮಾನವ ಹಕ್ಕುಗಳ ಉಲ್ಲಂಘನೆ, ವಿಚಾರಣಾಧೀನ ಕೈದಿಗಳ ಸಾವು, ಅತ್ಯಾಚಾರ, ಜನರಿಗೆ ಬೆಂಕಿ ಹಾಕುವಂತ ಕ್ರೂರ ವರ್ತನೆಗಳು ಹೊರಜಗತ್ತಿಗೆ ಬಂದವು. ಸರಕಾರ ಮಾತ್ರ ಗಟ್ಟಿಯಾಗಿ ಸೇನೆ ಬೆನ್ನಿಗೆ ನಿಂತಿತು.

ಇದಾದ ನಂತರ ಸಾಮೂಹಿಕ ಕೊಲೆಗಳ ಆರೋಪವನ್ನು ಮಲೇಷ್ಯಾ ಸರಕಾರದ ಮೇಲೆ ಸ್ವತಃ ವಿಶ್ವಸಂಸ್ಥೆಯ ಅಧಿಕಾರಿಯೊಬ್ಬರು ಮಾಡಿದ್ದರು. ಅಲ್ಲಿನ ಸೇನೆ ಮತ್ತು ಪೊಲೀಸರು ರೋಹಿಂಗ್ಯಾ ಮುಸ್ಲಿಮರ ಜನ ಸಂಖ್ಯೆಯನ್ನೇ ಕಡಿತಗೊಳಿಸಲು ಪಣತೊಟ್ಟಿದೆ ಎಂದು ಹಲವು ಅಂತರಾಷ್ಟ್ರೀಯ ವರದಿಗಳು ಹೇಳುತ್ತವೆ.

ಇದೀಗ ಅಲ್ಲಿನ ನಿರಾಯುಧ ರೋಹಿಂಗ್ಯಾ ಮಹಿಳೆಯರು, ಮಕ್ಕಳ ಮೇಲೆ ಪೊಲೀಸರ ಗುಂಡಿನ ದಾಳಿ, ಬೆಂಕಿ ಹಾಕುವಂಥ ಅಮಾನವೀಯ ಕೃತ್ಯಗಳು ಬೆಳಕಿಗೆ ಬರುತ್ತಿವೆ. ಇತ್ತೀಚಿನ ದಾಳಿಗಳಲ್ಲೇ ಕನಿಷ್ಟ ನೂರು ಜನ ರೊಹಿಂಗ್ಯಾ ಸಮುದಾಯದವರು ಅಸುನೀಗಿದ್ದರೆ, 50,000ಕ್ಕೂ ಹೆಚ್ಚು ಜನರು ಹಿಂಸಾತ್ಮಕ ದಾಳಿಗೆ ಗುರಿಯಾಗಿದ್ದಾರೆ.

ಎಲ್ಲೆಲ್ಲೂ ನಿರಾಶ್ರಿತರು:

ಸದ್ಯ ಈ ಜನರ ಪರಿಸ್ಥಿತಿ ಅತ್ತ ಧರೆ ಇತ್ತ ಪುಲಿ ಎನ್ನುವಂತಾಗಿದೆ. ಮಯನ್ಮಾರ್ ಸೇನೆಯ ಹಿಂಸಾಚಾರಕ್ಕೆ ಬೆದರಿ ದೇಶ ಬಿಟ್ಟವರು ಬಾಂಗ್ಲಾದೇಶ ಮತ್ತು ಮಯನ್ಮಾರ್ ಗಡಿಗಳ ಮಧ್ಯದ ‘ನೋ ಮ್ಯಾನ್ಸ್ ಲ್ಯಾಂಡ್’ (ಎರಡೂ ದೇಶಗಳಿಗೆ ಸೇರದ ಖಾಲಿ ಪ್ರದೇಶ) ಜಾಗದಲ್ಲಿ ನಿಂತಿದ್ದಾರೆ. ಅತ್ತ ಬಾಂಗ್ಲಾ ತನ್ನ ಗಡಿಯೊಳಕ್ಕೆ ಇವರನ್ನು ಬರಲು ಬಿಡುತ್ತಿಲ್ಲ. ಮಯನ್ಮಾರ್‌ಗೆ ಮತ್ತೆ ಮರಳಲು ಅವಕಾಶ ನೀಡುತ್ತಿಲ್ಲ.

ಇವರಲ್ಲದೆ 1970ರಿಂದ ಆರಂಭಿಸಿ ವಲಸೆ ಹೋದ ಸುಮಾರು 10 ಲಕ್ಷ ರೋಹಿಂಗ್ಯಾ ಮುಸ್ಲಿಮರು ಬೇರೆ ಬೇರೆ ದೇಶಗಳಲ್ಲಿದ್ದಾರೆ. ಇವರು ಬೀಸೋ ದೊಣ್ಣೆಯಿಂದ ತಪ್ಪಿಸಿಕೊಂಡಿದ್ದಾರಾದರೂ ಅಪಾಯ, ಅನಿಶ್ಚಿತತೆಗಳಲ್ಲೇ ಬದುಕಿನ ಬಂಡಿ ಎಳೆಯುತ್ತಿದ್ದಾರೆ.

ಭಾರತದ ವಿಚಾರವನ್ನೇ ತೆಗೆದುಕೊಂಡರೆ ಇಲ್ಲಿ ಸುಮಾರು 14,000 ರೋಹಿಂಗ್ಯಾ ಮುಸ್ಲಿಮರಿದ್ದಾರೆ ಎಂದು ವರದಿಗಳು ಹೇಳುತ್ತವೆ. ಇವರನ್ನು ವಾಪಾಸ್ ಕಳುಹಿಸುವ ಕುರಿತು ಕೇಂದ್ರ ಗೃಹ ಇಲಾಖೆ ರಾಜ್ಯ ಸಚಿವ ಕಿರಣ್ ರಿಜಿಜು ಲೋಕಸಭೆಯಲ್ಲಿ ಹೇಳಿಕೆ ನೀಡಿದ್ದರು. ಜತೆಗೆ ಜಮ್ಮು ಕಾಶ್ಮೀರವೂ ಸೇರಿದಂತೆ ದೇಶದ ಹಲವು ಭಾಗಗಲ್ಲಿ ರೋಹಿಂಗ್ಯಾ ಮುಸ್ಲಿಮರನ್ನು ಗಡಿಪಾರು ಮಾಡುವಂತ ಪ್ರತಿಭಟನೆಗಳೂ ನಡೆಯುತ್ತಿವೆ. ಹೀಗಾಗಿ ಭಾರತದಲ್ಲಿ ತಾತ್ಕಾಲಿಕ ನೆಲೆ ಸಿಕ್ಕಿದ್ದರೂ ಅದಕ್ಕೆ ದೀರ್ಘ ಕಾಲದ ಗ್ಯಾರೆಂಟಿಯಂತೂ ಇಲ್ಲ.

ಇದೇ ರೀತಿ ಬಾಂಗ್ಲಾದೇಶದಲ್ಲಿ ಸುಮಾರು 5 ಲಕ್ಷ ಜನ, ಮೇಲೇಷ್ಯಾದಲ್ಲಿ 1.5 ಲಕ್ಷ ಜನ, ಥಾಯ್ಲಾಂಡ್ ನಲ್ಲಿ 5 ಸಾವಿರ, ಸೌದಿ ಅರೇಬಿಯಾದಲ್ಲಿ 2 ಲಕ್ಷ, ಪಾಕಿಸ್ತಾನದಲ್ಲಿ 3.5 ಲಕ್ಷ, ಯುಎಇನಲ್ಲಿ 10 ಸಾವಿರ ಜನರಿರಬಹುದು ಎಂದು ವಿವಿಧ ಮಾನವ ಹಕ್ಕು ಸಂಘಟನೆಗಳ ವರದಿ ಆಧರಿಸಿ ‘ಅಲ್ ಜಝೀರಾ’ ಮಾಧ್ಯಮ ಸಂಸ್ಥೆ ಲೆಕ್ಕ ಹಾಕಿದೆ. ಇವರ ಮುಂದಿನ ಪರಿಸ್ಥಿತಿ ಏನು ಎಂಬುದಕ್ಕೂ ಉತ್ತರವಿಲ್ಲ.

rohingya-5

ಮಾತು ಸೋತ ಆ್ಯಂಗ್ ಸಾನ್ ಸೂ ಕಿ:

ಹಾಗೆ ನೋಡಿದರೆ ನೋಬೆಲ್ ಪ್ರಶಸ್ತಿ ವಿಜೇತೆ, ಮಾನವ ಹಕ್ಕು ಹೋರಾಟಗಾರ್ತಿ ಆ್ಯಂಗ್ ಸಾನ್ ಸೂ ಕಿಯವರ ಸರಕಾರ ಮಯನ್ಮಾರ್‌ನಲ್ಲಿ ಅಧಿಕಾರ ನಡೆಸುತ್ತಿದೆ. ಸೇನೆಯ ಮೇಲೆ ಅವರ ಸರಕಾರಕ್ಕೆ ಹಿಡಿತವಿಲ್ಲದಿರಬಹುದು, ಆದರೆ ಇಂಥಹ ಮನಕಲಕುವ ದೌರ್ಜನ್ಯಗಳನ್ನು ನಡೆದಾಗಲೂ ಆಕೆ ಕಂಡೂ ಕಾಣದಂತೆ ಇರುವುದು ವಿಶ್ವಮಟ್ಟದಲ್ಲಿ ಆಕೆಯ ಬಗ್ಗೆ ಟೀಕೆಗಳು ವ್ಯಕ್ತವಾಗಿವೆ.

ಇಷ್ಟೆಲ್ಲಾ ಸಮಸ್ಯೆಗಳ ನಡುವೆಯೂ ಇತ್ತೀಚೆಗೆ ರೋಹಿಂಗ್ಯಾ ಭಾಷೆಯ ಮೊದಲ ಸುದ್ದಿ ವಾಹಿನಿ ಆರಂಭವಾಗಿದೆ. ನಮ್ಮ ಜನರ ಸಮಸ್ಯೆಗಳನ್ನು ನಮ್ಮದೇ ಭಾಷೆಯಲ್ಲಿ ನಾವೇ ಹೇಳುತ್ತೀವಿ ಎಂದು ಹೊಸ ತಲೆಮಾರಿನ ರೋಹಿಂಗ್ಯಾ ವಿದ್ಯಾವಂತ ಯುವಕ ಯುವತಿಯರು ಮುಂದಾಗಿದ್ದಾರೆ. ಇವು ಬದುಕಿಗಾಗಿ ನಡೆಯುತ್ತಿರುವ ನಿರಂತರ ಹೋರಾಟದ ಬೆಳಕಿನ ಕಿರಣಗಳು. ಆದರೆ ಈ ಬೆಳಕುಗಳನ್ನು ಆರಿಸಲು ಹೊರಟಿರುವುದು ಬೌದ್ಧ ಧರ್ಮದ ಭಯೋತ್ಪಾದಕರು. ಅವರು ಪ್ರತಿನಿಧಿಸುವ ಧರ್ಮ ಕೂಡ ಒಂದು ಕಾಲದಲ್ಲಿ ಬೆಳಕಿನ ಕುರಿತೇ ಬೋಧಿಸಿತ್ತು ಎಂಬುದನ್ನು ಧರ್ಮದ ಅಮಲು ಮರೆಸಿದಂತಿದೆ.

Top