An unconventional News Portal.

‘ಅಲ್ಪಸಂಖ್ಯಾತ ಲಿಂಗಾಯತ ಧರ್ಮ’ದ ಘೋಷಣೆ ಹೇಗೆ?: ಮೀಸಲಾತಿ ಕೋಟದಲ್ಲಿ ಆಗುವ ವ್ಯತ್ಯಾಸಗಳೇನು?

‘ಅಲ್ಪಸಂಖ್ಯಾತ ಲಿಂಗಾಯತ ಧರ್ಮ’ದ ಘೋಷಣೆ ಹೇಗೆ?: ಮೀಸಲಾತಿ ಕೋಟದಲ್ಲಿ ಆಗುವ ವ್ಯತ್ಯಾಸಗಳೇನು?

ರಾಜ್ಯದಲ್ಲಿ ವಿಧಾನಸಭಾ ಚುನಾವಣೆ ಹತ್ತಿರ ಬರುತ್ತಿರುವಾಗಲೇ, ಸ್ವತಂತ್ರ ಲಿಂಗಾಯತ ಧರ್ಮದ ಬೇಡಿಕೆ ಹೊಸ ಉತ್ಸಾಹಗಳೊಂದಿಗೆ ಎದ್ದು ಬಂದಿದೆ. ಅಧಿಕಾರದಲ್ಲಿರುವವರ ಒತ್ತಾಸೆಗಳೂ ಇದರ ಹಿಂದಿರುವುದು, ಸಹಜವಾಗಿಯೇ ಪ್ರತ್ಯೇಕ ಧರ್ಮದ ಬೇಡಿಕೆಗೆ ಆನೆ ಬಲ ಸಿಕ್ಕಂತಾಗಿದೆ. ಹೀಗಾಗಿಯೇ ಹಿಂದೆಂದೂ ಇಲ್ಲದಷ್ಟು, ಈ ಬಾರಿ ‘ಸ್ವತಂತ್ರ ಲಿಂಗಾಯತ ಧರ್ಮ’ಕ್ಕಾಗಿ ಸಲ್ಲಿಕೆಯಾಗುತ್ತಿರುವ ಮನವಿಗೆ ಭಾರಿ ಪ್ರಚಾರವೂ ಸಿಗುತ್ತಿದೆ.

ಹಾಗೆ ನೋಡಿದರೆ, ಗ್ರಾಮೀಣ ಭಾಗದ ವೀರಶೈವ- ಲಿಂಗಾಯತ ಸಮುದಾಯದಲ್ಲಿ ಸ್ವತಂತ್ರ ಧರ್ಮದ ತಾತ್ವಿಕ ಚರ್ಚೆಗಳು ದೊಡ್ಡ ಪರಿಣಾಮಗಳನ್ನು ಇನ್ನೂ ಮೂಡಿಸಿಲ್ಲ. ಆದರೆ ರಾಜಕೀಯದ ಪಡಸಾಲೆಯಲ್ಲಿ ಹಾಗೂ ಮಠಮಾನ್ಯಗಳ ಅಂಗಳಗಳಲ್ಲಿ ಪ್ರತ್ಯೇಕ ಧರ್ಮದ ಬೇಡಿಕೆ ಮರಗು ಪಡೆದುಕೊಳ್ಳುತ್ತಿದೆ. ನಿಧಾನವಾಗಿ ಇದು ಸಾಮಾನ್ಯ ಲಿಂಗಾಯತರ ಮೇಲೆ ಪ್ರಭಾವ ಬೀರುವ ಹಾಗೆ ಕಾಣಿಸುತ್ತಿದೆ. ಜನ ಸಾಮಾನ್ಯರೂ ಕೂಡ ಈ ಬೇಡಿಕೆಗೆ ಸ್ಪಂದಿಸಲು ಪ್ರಮುಖ ಕಾರಣವೊಂದು ಪ್ರಚಾರ ಪಡೆದುಕೊಳ್ಳುತ್ತಿದೆ; ಅದು, ಮೀಸಲಾತಿಯ ವಿಚಾರ.

“ಒಂದು ವೇಳೆ ಲಿಂಗಾಯತ ಎಂಬುದು ಪ್ರತ್ಯೇಕ ಧರ್ಮವಾದರೆ ಮೀಸಲಾತಿ ಸಿಗುತ್ತದೆ. ಇದರಿಂದ ಸಮುದಾಯದ ಅಭಿವೃದ್ಧಿ ಸಾಧ್ಯವಾಗುತ್ತೆ ಎಂದು ‘ಬುದ್ದಿ’ಯವರು ಹೇಳುತ್ತಿದ್ದರು,” ಎನ್ನುತ್ತಾರೆ ಬೆಳಗಾವಿಯ ಮಲ್ಲೇಶ್. ಕಳೆದ ಐದಾರು ವರ್ಷಗಳಿಂದ ಅವರು ಸರಕಾರಿ ಉದ್ಯೋಗಕ್ಕಾಗಿ ಅರ್ಜಿ ಸಲ್ಲಿಸಿಕೊಂಡು ಬರುತ್ತಿದ್ದಾರೆ. ಜಾತಿ ವಿಚಾರಕ್ಕೆ ಬಂದಾಗ ಅವರು ‘ವೀರಶೈವ ಲಿಂಗಾಯತ’ ಎಂದೂ, ಧರ್ಮದ ಕಾಲಂ ಬಂದಾಗ ‘ಹಿಂದೂ’ ಎಂದು ಅರ್ಜಿಗಳನ್ನು ತುಂಬಿಸುತ್ತಿದ್ದಾರೆ. “ಲಿಂಗಾಯತ ಪ್ರತ್ಯೇಕ ಧರ್ಮವಾದರೆ ಸರಕಾರಿ ಉದ್ಯೋಗ ಸಿಗುವ ಸಾಧ್ಯತೆ ಹೆಚ್ಚು ಅನ್ನುತ್ತಿದ್ದಾರೆ. ಇದರಿಂದಾಗಿ ನನ್ನಂತಹ ಪದವೀದರ ನಿರುದ್ಯೋಗಿಗಳಿಗೆ ಅನುಕೂಲ ಆಗಬಹುದೇನೋ,” ಎನ್ನುತ್ತಾರೆ ಮಲ್ಲೇಶ್.

ಇದು ಮಲ್ಲೇಶ್ ರೀತಿಯಲ್ಲಿಯೇ ವೀರಶೈವ- ಲಿಂಗಾಯತ ಸಮುದಾಯದ ಹಲವರ ಭಾವನೆ ಕೂಡ. ವಿರಕ್ತ ಮಠಗಳ ಮಠಾಧೀಶರು, ಪ್ರತ್ಯೇಕ ಧರ್ಮದ ಬೇಡಿಕೆಯನ್ನು ಜನರಿಗೆ ಅರ್ಥಪಡಿಸಲು ಇದನ್ನೇ ಅಸ್ತ್ರವಾಗಿ ಬಳಸಿಕೊಳ್ಳುತ್ತಿದ್ದಾರೆ. ಒಂದು ವೇಳೆ, ಸ್ವತಂತ್ರ ಧರ್ಮದ ಸ್ಥಾನಮಾನ ಸಿಕ್ಕರೆ ಉದ್ಯೋಗ, ಶಿಕ್ಷಣ ಮತ್ತಿತರ ವಿಚಾರಗಳಲ್ಲಿ ಅಭಿವೃದ್ಧಿ ಸಾಧ್ಯವಾಗುತ್ತದೆ ಎಂಬ ಭಾವನೆ ಬೆಳೆಸುವ ಪ್ರಯತ್ನಕ್ಕೆ ಈಗಾಗಲೇ ಚಾಲನೆಯೂ ದೊರೆತಿದೆ. “ಪ್ರತ್ಯೇಕ ಧರ್ಮದ ಬೇಡಿಕೆ ಹಿಂದೆ ಹಲವು ತಾತ್ವಿಕ ವಿಚಾರಗಳಿವೆ. ಆದರೆ ಅವೆಲ್ಲವನ್ನೂ ಒಂದೇ ಏಟಿಗೆ ಜನರಿಗೆ ತಿಳಿಯಪಡಿಸುವುದು ಕಷ್ಟ. ಹೀಗಾಗಿ ಮೀಸಲಾತಿ ಸಿಗುತ್ತದೆ ಎಂದರೆ ಸಹಜವಾಗಿಯೇ ಬೆಂಬಲವೂ ವ್ಯಾಪಕವಾಗುತ್ತದೆ,” ಎನ್ನುತ್ತಾರೆ ಹೆಸರನ್ನು ಬಹಿರಂಗಪಡಿಸಲು ಇಚ್ಚಿಸದ ಉತ್ತರ ಕರ್ನಾಟಕದ ಲಿಂಗಾಯತ ಮಠಾದೀಶರೊಬ್ಬರು.

ಮೀಸಲಾತಿ ಸಿಗುತ್ತಾ?:

ಲಿಂಗಾಯತ ಧರ್ಮವನ್ನು ಪ್ರತ್ಯೇಕ ಧರ್ಮ ಎಂದು ಘೋಷಣೆ ಮಾಡಬೇಕಾದರೆ ರಾಜ್ಯ ಸರಕಾರ ರಾಜ್ಯಪಾಲರ ಮೂಲಕ ಕೇಂದ್ರ ಸರಕಾರಕ್ಕೆ ಮನವಿ ಸಲ್ಲಿಸಬೇಕಿದೆ. ಕೇಂದ್ರ ಸರಕಾರ ತನ್ನ ಸಂಪುಟದಲ್ಲಿ ತೀರ್ಮಾನ ತೆಗೆದುಕೊಂಡು, ನಂತರ ಸಂಸತ್ನಲ್ಲಿ ಈ ವಿಚಾರವನ್ನು ಚರ್ಚಿಸಿ ಮುಂದಿನ ಪ್ರಕ್ರಿಯೆಗೆ ಹಸಿರು ನಿಶಾನೆ ಪಡೆದುಕೊಳ್ಳಬೇಕಿದೆ. ಆ ನಂತರ ರಾಷ್ಟ್ರೀಯ ಅಲ್ಪಸಂಖ್ಯಾತ ಆಯೋಗ ಕಾಯ್ದೆಯ 2(ಸಿ) ಅಡಿಯಲ್ಲಿ ಪ್ರತ್ಯೇಕ ಧರ್ಮದ ಘೋಷಣೆ ಹೊರಬೀಳಬೇಕಿದೆ. “ಇದು ಸಾಕಷ್ಟು ಸಮಯ ಹಿಡಿಯುವ ಸುದೀರ್ಘ ಪ್ರಕ್ರಿಯೆ. ಅಷ್ಟೊತ್ತಿಗೆ ಕರ್ನಾಟಕದಲ್ಲಿ ಚುನಾವಣೆಯೇ ಮುಗಿದಿರುವ ಸಾಧ್ಯತೆಯೂ ಇದೆ,” ಎನ್ನುತ್ತಾರೆ ಹಿಂದುಳಿದ ವರ್ಗಗಳ ಅಭಿವೃದ್ಧಿ ನಿಗಮದ ಮಾಜಿ ಅಧ್ಯಕ್ಷ, ವಕೀಲ ಸಿ. ಎಸ್. ದ್ವಾರಕನಾಥ್.

ಒಂದು ವೇಳೆ, ಲಿಂಗಾಯತರಿಗೆ ಸ್ವತಂತ್ರ ಧರ್ಮದ ಸ್ಥಾನಮಾನ ಸಿಕ್ಕರೂ ಮೀಸಲಾತಿ ವಿಚಾರಗಳಲ್ಲಿ ಅಂತಹ ದೊಡ್ಡ ವ್ಯತ್ಯಾಸಗಳು ಕಾಣಿಸುವುದಿಲ್ಲ ಎನ್ನುತ್ತಾರೆ ದ್ವಾರಕನಾಥ್. “ಸಂವಿಧಾನದ ಅಡಿಯಲ್ಲಿ ಅಲ್ಪಸಂಖ್ಯಾತ ಧರ್ಮದವರಿಗೆ ಮೀಸಲಾತಿ ವಿಚಾರದಲ್ಲಿ ಹೆಚ್ಚಿನ ಅನುಕೂಲ ಏನೂ ಇಲ್ಲ. ಈಗಿರುವ ಮೀಸಲಾತಿಯನ್ನೇ ಬೇರೆ ಸ್ವರೂಪದಲ್ಲಿ ಮುಂದುವರಿಸಲಾಗುತ್ತದೆ ಅಷ್ಟೆ. ಸದ್ಯ ರಾಜ್ಯದಲ್ಲಿ ಹಿಂದುಳಿದ ವರ್ಗಗಳ ಅಡಿಯಲ್ಲಿ ವೀರಶೈವ ಲಿಂಗಾಯತರು ಸುಮಾರು 42 ಉಪಜಾತಿಗಳ ಹೆಸರಿನಲ್ಲಿ ಮೀಸಲಾತಿ ಪಡೆಯುತ್ತಿದ್ದಾರೆ. ಹಿಂದುಳಿತ ವರ್ಗಗಳಿಗಳಿಗೆ ಒಟ್ಟು ಶೇ. 32ರಷ್ಟು ಮೀಸಲಾತಿ ಇದೆ. ಇದೇ ಕೋಟಾದ ಅಡಿಯಲ್ಲಿಯೇ ಧಾರ್ಮಿಕ ಹಾಗೂ ಭಾಷಾ ಅಲ್ಪಸಂಖ್ಯಾತರಿಗೆ ಶೇ. 5ರಷ್ಟು ಮೀಸಲಾತಿ ನೀಡಲಾಗುತ್ತಿದೆ. ಲಿಂಗಾಯತರು ಪ್ರತ್ಯೇಕ ಧರ್ಮವಾದರೆ ಹಿಂದುಳಿದ ವರ್ಗಗಳ ಮೀಸಲಾತಿ ಕೋಟಾದಿಂದ ಅಲ್ಪಸಂಖ್ಯಾತ ಕೋಟಾದ ಕೆಳಗೆ ಬರುತ್ತಾರೆ. ಅದರಿಂದ ಹೆಚ್ಚಿನ ವ್ಯತ್ಯಾಸ ಕಾಣಿಸುವುದಿಲ್ಲ,” ಎಂದು ಅವರು ವಿಶ್ಲೇಷಿಸುತ್ತಾರೆ.

ಧಾರ್ಮಿಕ ಅಲ್ಪಸಂಖ್ಯಾತರು:

ವೀರಶೈವರಿಂದ ಹೊರಬರುವ ಲಿಂಗಾಯತರು ಕಡಿಮೆ ಸಂಖ್ಯೆಯಲ್ಲಿರುವ ಹಿನ್ನೆಲೆಯಲ್ಲಿ ಧಾರ್ಮಿಕ ಅಲ್ಪಸಂಖ್ಯಾತರು ಎನ್ನಿಸಿಕೊಳ್ಳುತ್ತಾರೆ. “ಸಂವಿಧಾನದ ಪರಿಚ್ಛೇಧ 29 ಹಾಗೂ 30ರ ಅಡಿಯಲ್ಲಿ ಧಾರ್ಮಿಕ ಹಾಗೂ ಭಾಷಾ ಅಲ್ಪಸಂಖ್ಯಾತರಿಗೆ ಕೆಲವು ಎಕ್ಸ್’ಕ್ಲೂಸಿವ್ ಆದ ಮೂಲಭೂತ ಹಕ್ಕುಗಳು ಸಿಗುತ್ತವೆ. ತಮ್ಮ ಧರ್ಮದ ಅಸ್ಮಿತೆಗಳನ್ನು ಉಳಿಸಿಕೊಳ್ಳುವ ಹಕ್ಕು ಹಾಗೂ ಶೈಕ್ಷಣಿಕ ಸಂಸ್ಥೆಗಳನ್ನು ಸ್ಥಾಪಿಸಲು ಹಕ್ಕುಗಳು ಸಿಗುತ್ತವೆ. ಇದಕ್ಕೆ ಸರಕಾರದಿಂದ ನೆರವನ್ನೂ ಪಡೆದುಕೊಳ್ಳಬಹುದು. ಇದು ಸ್ವತಂತ್ರ ಲಿಂಗಾಯತ ಧರ್ಮಕ್ಕೆ ಸಿಗುವ ಅನುಕೂಲಗಳು,” ಎನ್ನುತ್ತಾರೆ ಹಿಂದುಳಿದ ವರ್ಗಗಳ ಅಭಿವೃದ್ಧಿ ನಿಗಮದ ಹಾಲಿ ಅಧ್ಯಕ್ಷ ಕಾಂತರಾಜ್.

ಸದ್ಯ, ಮದರಸಾಗಳನ್ನು ಸ್ಥಾಪಿಸಲು ಸಂವಿಧಾನದ ಈ ಪರಿಚ್ಛೇಧಗಳೇ ಅನುಕೂಲ ಮಾಡಿಕೊಡುತ್ತಿವೆ. ಮುಂದಿನ ದಿನಗಳಲ್ಲಿ ಲಿಂಗಾಯತ ಪ್ರತ್ಯೇಕ ಧರ್ಮವಾದರೆ ಧಾರ್ಮಿಕ ಶಿಕ್ಷಣವನ್ನು ಬೆಳೆಸಲು ಒಂದಷ್ಟು ಹೊಸ ಶಿಕ್ಷಣ ಸಂಸ್ಥೆಗಳನ್ನು ಸ್ಥಾಪಿಸಲು ಅನುಕೂಲವಾಗುತ್ತದೆ ಎಂಬುದನ್ನು ತಜ್ಞರು ಮುಂದಿಡುತ್ತಾರೆ.

ಪ್ರತ್ಯೇಕ ಧರ್ಮದ ಬೇಡಿಕೆ ಮುಖ್ಯವಾಹಿನಿಯಲ್ಲಿ ಸದ್ದು ಮಾಡುತ್ತಿರುವುದರ ಹಿಂದೆ, ಇಂತಹ ತಾಂತ್ರಿಕ ಅಂಶಗಳಿಗಿಂತ ಹೆಚ್ಚಾಗಿ ರಾಜಕೀಯ ಹೆಚ್ಚು ಕೆಲಸ ಮಾಡುತ್ತಿದೆ. “ಲಿಂಗಾಯತರ ಪ್ರತ್ಯೇಕ ಧರ್ಮದ ವಿಚಾರ ಉತ್ತರ ಕರ್ನಾಟಕದ, ಲಿಂಗಾಯತರು ಹೆಚ್ಚು ಸಂಖ್ಯೆಯಲ್ಲಿರುವ ಜಿಲ್ಲೆಗಳಲ್ಲಿ ಪರಿಣಾಮ ಬೀರಬಹುದು. ಈ ಜಿಲ್ಲೆಗಳಲ್ಲಿ ಬಿಜೆಪಿ ಹೆಚ್ಚು ಪ್ರಾಬಲ್ಯ ಹೊಂದಿದೆ. ಇದೀಗ ವೀರಶೈವರು ಮತ್ತು ಲಿಂಗಾಯತರು ಎಂದು ಪ್ರತ್ಯೇಕತೆ ಸೃಷ್ಟಿಯಾಗಿರುವ ಹಿನ್ನೆಲೆಯಲ್ಲಿ ಬಿಜೆಪಿಯ ಮತ ಬ್ಯಾಂಕ್ ಒಡೆದುಹೋಗಲಿದೆ ಎಂಬ ಲೆಕ್ಕಾಚಾರ ಕಾಂಗ್ರೆಸ್ ಪಕ್ಷದ್ದು,” ಎನ್ನುತ್ತಾರೆ ಸಿ. ಎಸ್. ದ್ವಾರಕನಾಥ್.

ರಾಜಕೀಯದ ಆಚೆಗೂ ಪ್ರತ್ಯೇಕ ಧರ್ಮದ ಸ್ಥಾನಮಾನ ಲಿಂಗಾಯತರಗ ಮೀಸಲಾತಿ ವಿಚಾರದಲ್ಲಿ ಹೆಚ್ಚು ಅನುಕೂಲವನ್ನೇನೂ ತಂದುಕೊಡುವುದಿಲ್ಲ. ಅದೇ ವೇಳೆ, ಅಲ್ಪಸಂಖ್ಯಾತ ಧರ್ಮದ ಸ್ಥಾನಮಾನ ಅಡಿಯಲ್ಲಿ ಶಿಕ್ಷಣ ಸಂಸ್ಥೆಗಳನ್ನು ಸ್ಥಾಪಿಸಲು ದೊಡ್ಡ ಪ್ರಮಾಣದ ನೆರವು ಸಿಗುತ್ತದೆ. ಇದು ವಿರಕ್ತ ಮಠಗಳು ತಮ್ಮ ಧರ್ಮದ ನೆಲೆಯನ್ನು, ಅಸ್ಮಿತೆಗಳನ್ನು ಇನ್ನಷ್ಟು ಬಿರುಸಾಗಿ ಪ್ರಚಾರ ಮಾಡಲು ಅನುಕೂಲ ಮಾಡಿಕೊಡಬಹುದು.

Top