An unconventional News Portal.

ರಾಜ್ಯಸಭಾ ಚುನಾವಣೆಯ ಕಷ್ಟಕರ ‘ಅಂಕ ಗಣಿತ’: ಅರ್ಥ ಮಾಡಿಕೊಳ್ಳಲು 3 ಸರಳ ಸೂತ್ರಗಳು!

ರಾಜ್ಯಸಭಾ ಚುನಾವಣೆಯ ಕಷ್ಟಕರ ‘ಅಂಕ ಗಣಿತ’: ಅರ್ಥ ಮಾಡಿಕೊಳ್ಳಲು 3 ಸರಳ ಸೂತ್ರಗಳು!

ರಾಜ್ಯಸಭೆ ಚುನಾವಣೆ ‘ಕುದುರೆ ವ್ಯಾಪಾರ’ದ ಹಿನ್ನೆಲೆಯಲ್ಲಿ ದೇಶದ ಸುದ್ದಿಕೇಂದ್ರಕ್ಕೆ ಬಂದಿದೆ.

ಎಲ್ಲವೂ ಅಂದುಕೊಂಡಂತೆ ನಡೆದರೆ ಜೂ. 11ರಂದು ನಡೆಯುವ ಪರೋಕ್ಷ ಮತದಾನದ ಮೂಲಕ ನಾಲ್ವರನ್ನು ರಾಜ್ಯದ ಚುನಾಯಿತ ಶಾಸಕರು ಮೇಲ್ಮನೆಗೆ ಕಳುಹಿಸಿ ಕೊಡಲಿದ್ದಾರೆ. ಈ ಸಮಯದಲ್ಲಿ ರಾಜ್ಯಸಭಾ ಚುನಾವಣೆಯ ಹೇಗೆ ನಡೆಯುತ್ತದೆ? ಇಲ್ಲಿನ ‘ಮ್ಯಾಜಿಕ್ ನಂಬರ್’ ಹಿಂದಿರುವ ಫಾರ್ಮುಲಾ ಏನು? ಮತ್ತಿತರ ವಿಚಾರಗಳನ್ನು ಅತ್ಯಂತ ಸರಳವಾಗಿ ವಿವರಿಸುವ ಪ್ರಯತ್ನವನ್ನು ‘ಸಮಾಚಾರ’ ಇಲ್ಲಿ ಮಾಡಿದೆ.

ಸಾಮಾನ್ಯವಾಗಿ ಚುನಾವಣೆ ಎಂದರೆ ಯಾರು ಹೆಚ್ಚು ಮತಗಳನ್ನು ಪಡೆಯುತ್ತಾರೋ, ಅವರು ಗೆದ್ದಂತೆ. ವಿಧಾನಸಭೆ ಅಥವಾ ಲೋಕಸಭೆ ಚುನಾವಣೆಯಲ್ಲಿ ಹೀಗೆ ಜನರಿಂದ ನೇರ ಮತದಾನದ ಮೂಲಕ ಆಯಾ ಕ್ಷೇತ್ರದಿಂದ ಒಬ್ಬ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಿ ಕಳುಹಿಸಲಾಗುತ್ತದೆ. ಇದನ್ನು ಅರ್ಥ ಮಾಡಿಕೊಳ್ಳುವುದು ಸುಲಭ. ಆದರೆ ರಾಜ್ಯಸಭೆ ಚುನಾವಣೆ ವಿಚಾರದಲ್ಲಿ ಬಂದಾಗ ಈ ಲೆಕ್ಕಾಚಾರಗಳು ನಡೆಯುವುದಿಲ್ಲ. ಅಲ್ಲಿ ಬೇರೆಯದೇ ‘ಅಂಕ ಗಣಿತ’ ಕೆಲಸ ಮಾಡುತ್ತದೆ.


1.

ಈ ಕುರಿತು ಇನ್ನಷ್ಟು ಆಳಕ್ಕೆ ಇಳಿಯುವ ಮುನ್ನ ರಾಜ್ಯಸಭೆಯ ಕುರಿತು ಕೆಲವು ಮೂಲಭೂತ ವಿಚಾರಗಳನ್ನು ನಾವು ಅರ್ಥ ಮಾಡಿಕೊಳ್ಳಬೇಕು. ‘ಮೇಲ್ಮನೆ’, ‘ಚಿಂತಕರ ಚಾವಡಿ’ ಅಂತ ಕರೆಸಿಕೊಳ್ಳುವ ರಾಜ್ಯ ಸಭೆಯಲ್ಲಿ ಒಟ್ಟು 245 ಎಂಪಿಗಳು ಇರುತ್ತಾರೆ. ಇವರಲ್ಲಿ 12 ಜನ ನೇರವಾಗಿ ರಾಷ್ಟ್ರಪತಿ ಮೂಲಕ ನಾಮನಿರ್ದೇಶನಗೊಳ್ಳುತ್ತಾರೆ. ಉಳಿದ 233 ಸ್ಥಾನಗಳಿಗೆ ದೇಶಾದ್ಯಂತ ಜನರಿಂದ ಚುನಾಯಿತರಾದ ಶಾಸಕರು ಚುನಾವಣೆ ಮೂಲಕ ಆರಿಸಿ ಕಳುಹಿಸುತ್ತಾರೆ.

ಈ 233 ಸ್ಥಾನಗಳನ್ನು ರಾಜ್ಯಗಳು ಹೊಂದಿರುವ ಜನಸಂಖ್ಯೆಯ ಆಧಾರದ ಮೇಲೆ ಆಯಾ ರಾಜ್ಯಗಳಿಗೆ ವಿಂಗಡಣೆ ಮಾಡಲಾಗುತ್ತಿದೆ. ಉದಾಹರಣೆಗೆ ದೇಶದಲ್ಲಿ ಅತೀ ಹೆಚ್ಚು ಜನಸಂಖ್ಯೆ ಹೊಂದಿರುವ ಉತ್ತರ ಪ್ರದೇಶಕ್ಕೆ ರಾಜ್ಯಸಭೆಯಲ್ಲಿ 31 ಸ್ಥಾನಗಳನ್ನು ನೀಡಲಾಗಿದೆ. ಕರ್ನಾಟಕದಿಂದ 12 ಸ್ಥಾನಗಳನ್ನು ತುಂಬಲಾಗುತ್ತದೆ. ತ್ರಿಪುರಕ್ಕೆ ಒಂದು ರಾಜ್ಯಸಭಾ ಸ್ಥಾನವಿದೆ. ಹೀಗೆ, ಆಯಾ ರಾಜ್ಯಗಳ ಜನಸಂಖ್ಯೆಯ ಆಧಾರದ ಮೇಲೆ ಒಟ್ಟು 233 ರಾಜ್ಯಸಭಾ ಸ್ಥಾನಗಳಿಗೆ ಚುನಾವಣೆ ನಡೆಯಲಿದೆ.


2.

ಇದಕ್ಕೆ ಹೋಲಿಸಿದರೆ ಲೋಕಸಭೆಯ ಎಲ್ಲಾ 543 ಸ್ಥಾನಗಳಿಗೆ ದೇಶಾದ್ಯಂತ ಒಂದೇ ಬಾರಿಗೆ ಚುನಾವಣೆ ನಡೆಯುತ್ತದೆ. ಆದರೆ, ರಾಜ್ಯ ಸಭೆಗೆ ಪ್ರತಿ ಎರಡು ವರ್ಷಗಳಿಗೆ ಮೂರನೇ ಒಂದು ಸ್ಥಾನಗಳಿಗೆ ಚುನಾವಣೆ ನಡೆಯುತ್ತದೆ. ನೆನಪಿರಲಿ, ಇವರನ್ನು ಚುನಾಯಿಸುವ ಹಕ್ಕು ಇರುವುದು ಶಾಸಕರಿಗೆ ಮಾತ್ರ. ಉಹಾಹರಣೆಗೆ ಕರ್ನಾಟಕದಿಂದ ಪ್ರತಿ ಎರಡು ವರ್ಷಗಳಿಗೊಮ್ಮೆ ರಾಜ್ಯಸಭೆ ಚುನಾವಣೆ ನಡೆದರೆ, 4+4+4 ಸ್ಥಾನಗಳಿಗೆ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಿ ಕಳುಹಿಸಲಾಗುತ್ತದೆ.

ಕರ್ನಾಟಕದಿಂದ ರಾಜ್ಯಸಭೆಗೆ ಆಯ್ಕೆ ಆಗಬೇಕು ಎಂದರೆ ಅಭ್ಯರ್ಥಿಯು 45 ಮೊದಲ ಪ್ರಶಾಸ್ತ್ರ್ಯದ ಮತಗಳನ್ನು ಪಡೆಯಬೇಕು. ಅಂದರೆ, ಇದು ನಾವು ವಿಧಾನಸಭೆಗೆ, ಲೋಕಸಭೆಗೆ ಚಲಾಯಿಸುವ ಮತಗಳ ಲೆಕ್ಕಚಾರ ಅಲ್ಲ. ಇದನ್ನು ಅರ್ಥ ಮಾಡಿಕೊಳ್ಳಬೇಕು ಎಂದರೆ ಕೆಳಗಿನ ಸರಳ ‘ಅಂಕ ಗಣಿತ’ವನ್ನು ಗಮನಿಸಿ.

  • ಸದ್ಯ ಕರ್ನಾಟಕವನ್ನೇ ಉದಾಹರಣೆಯಾಗಿ ತೆಗೆದುಕೊಳ್ಳಿ. ನಮ್ಮಿಂದ ಒಟ್ಟು 12 ಜನರನ್ನು ಮೂರು ಹಂತಗಳಲ್ಲಿ ಆಯ್ಕೆ ಮಾಡಿ ಕಳುಹಿಸುತ್ತೇವೆ. ಅಂದರೆ, ಪ್ರತಿ ಎರಡು ವರ್ಷಗಳ ಅಂತರದಲ್ಲಿ 4+4+4 ಅಭ್ಯರ್ಥಿಗಳು ರಾಜ್ಯಸಭೆಗೆ ಆಯ್ಕೆ ಮಾಡಲಾಗುತ್ತದೆ.
  • ನಮ್ಮ ವಿಧಾನಸಭೆಯ ಒಟ್ಟು ಶಾಸಕರ ಬಲ 224. ಇವರೆಲ್ಲರೂ ಪ್ರತಿ ಸಾರಿ ರಾಜ್ಯಸಭೆಗೆ ನಡೆಯುವ ಚುನಾವಣೆಯಲ್ಲಿ ಪ್ರಶಾಸ್ತ್ಯ ನೀಡಿ ಮತಗಳನ್ನು ಚಲಾವಣೆ ಮಾಡುವ ಹಕ್ಕು ಹೊಂದಿರುತ್ತಾರೆ. ಇದರಲ್ಲಿ ರಾಜ್ಯಸಭೆಗೆ ಆಯ್ಕೆಯಾಗಬೇಕು ಎಂದರೆ 45 ಮೊದಲ ಪ್ರಾಶಸ್ತ್ಯದ ಮತಗಳು ಬೇಕು. ಈ 45 ಎಂಬ ‘ಮ್ಯಾಜಿಕ್ ನಂಬರ್’ನ್ನು ಈ ಫಾರ್ಮುಲಾ ಬಳಸಿ ಲೆಕ್ಕ ಹಾಕಲಾಗಿದೆ.

‘ಮ್ಯಾಜಿಕ್ ನಂಬರ್’ (45) = ಒಟ್ಟು ಶಾಸಕರ ಸಂಖ್ಯೆ (224)*100/ ಚುನಾವಣೆ ನಡೆಯುವ ರಾಜ್ಯಸಭೆ ಸ್ಥಾನಗಳು (4)+ 1


3.

ಈ ಹಿನ್ನೆಲೆಯಲ್ಲಿ ರಾಜ್ಯಸಭೆಗೆ ಕಾಂಗ್ರೆಸ್ ತನಗಿರುವ ಸಂಖ್ಯಾಬಲ(122)ದ ಮೇಲೆ ಇಬ್ಬರು ಅಭ್ಯರ್ಥಿಗಳನ್ನು ಯಾವುದೇ ಸಮಸ್ಯೆ ಇಲ್ಲದೆ ಚುನಾಯಿಸಿ ಕಳುಹಿಸುತ್ತದೆ. ಜತೆಗೆ, ಇನ್ನೂ 32 ಮತಗಳು ಕಾಂಗ್ರೆಸ್ ಬಳಿ ಹೆಚ್ಚಿಗೆ ಉಳಿಯುತ್ತದೆ. ಇದಕ್ಕೆ 13 ಶಾಸಕರ ಮತಗಳು ಜತೆಯಾದರೆ, ಮೂರನೇ ಅಭ್ಯರ್ಥಿಯನ್ನೂ ಚುನಾಯಿಸಿ ಕಳುಹಿಸಬಹುದು.

ಇನ್ನೊಂದೆಡೆ ಜೆಡಿಎಸ್ ಶಾಸಕರ ಬಲಕ್ಕೆ(40)ಕ್ಕೆ ಇನ್ನೂ 5 ಶಾಸಕರ ಮತಗಳು ಸೇರ್ಪಡೆಗೊಂಡರೆ ಪಕ್ಷದಿಂದ ಒಬ್ಬರು ಅಭ್ಯರ್ಥಿಯನ್ನು ಆರಿಸಿ ಕಳುಹಿಸಬಹುದಾಗಿದೆ.

ಬಿಜೆಪಿ (45) + ಬಿಎಸ್ಆರ್ ಕಾಂಗ್ರೆಸ್ (1) ಮತಗಳ ಪೈಕಿ ಒಬ್ಬರನ್ನು ಮೇಲ್ಮನೆಗೆ ಸಮಸ್ಯೆ ಇಲ್ಲದೆ ಆರಿಸಿ ಕಳುಹಿಸಬಹುದಾಗಿದೆ. ಜತೆಗೆ, 2 ಮತಗಳು ಹೆಚ್ಚಿದೆ ಉಳಿಯುತ್ತವೆ.

ಇದೀಗ ಕೇಳಿ ಬರುತ್ತಿರುವ ಶಾಸಕರ ‘ಕುದುರೆ ವ್ಯಾಪಾರ’ ಹಿಂದಿರುವ ಲೆಕ್ಕಾಚಾರ ಮತ್ತದರ ಹಿನ್ನೆಲೆ ಅರ್ಥ ಮಾಡಿಕೊಳ್ಳಲು ಇಷ್ಟು ಸಾಕಲ್ವಾ?

Top