An unconventional News Portal.

ಲೈಂಗಿಕ ದೌರ್ಜನಗಳ ‘ಸುದ್ದಿಯ ಗದ್ದಲ’: ಸಮಸ್ಯೆ ಇದೆ; ಪರಿಹಾರ ಇಲ್ಲ ಯಾಕೆ?

ಲೈಂಗಿಕ ದೌರ್ಜನಗಳ ‘ಸುದ್ದಿಯ ಗದ್ದಲ’: ಸಮಸ್ಯೆ ಇದೆ; ಪರಿಹಾರ ಇಲ್ಲ ಯಾಕೆ?

ಹೊಸ ವರ್ಷದ ಸಂಭ್ರಮಾಚರಣೆ, ಅದರ ಬೆನ್ನಲ್ಲೇ ಬಹಿರಂಗಗೊಂಡ ಲೈಂಗಿಕ ದೌರ್ಜನ್ಯದ ವಿಡಿಯೋ ಕರ್ನಾಟಕದ ಮಾನವನ್ನು ಅಂತರಾಷ್ಟ್ರೀಯ ಮಟ್ಟದಲ್ಲಿ ಹರಾಜು ಹಾಕಿದೆ.

ಡಿ. 31ರ ರಾತ್ರಿ ರಾಜಧಾನಿ ಬೆಂಗಳೂರಿನ ಎಂ. ಜಿ. ರಸ್ತೆ ಮತ್ತು ಬ್ರಿಗೇಡ್ ರಸ್ತೆಗಳಲ್ಲಿ ನಡೆದ ‘ಸಾಮೂಹಿಕ ಲೈಂಗಿಕ ದೌರ್ಜನ್ಯ’ ಪ್ರಕರಣ ಹಾಗೂ ಬುಧವಾರ ವರದಿಯಾಗಿರುವ ಕಮ್ಮನಹಳ್ಳಿಯ ಯುವತಿ ಮೇಲಿನ ದೌರ್ಜನ್ಯ ಪ್ರಕರಣಗಳಿಂದಾಗಿ ರಾಜ್ಯದಲ್ಲಿ ವಿಶೇಷವಾಗಿ ಬೆಂಗಳೂರಿನಲ್ಲಿ ಕಾನೂನು ಸುವ್ಯವಸ್ಥೆ ಹದಗೆಟ್ಟಿದೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಾಧ್ಯಮಗಳಲ್ಲಿ ಬೆಂಗಳೂರಿನ ಲೈಂಗಿಕ ದೌರ್ಜನ್ಯ ಪ್ರಕರಣ ಭಾರಿ ಸದ್ದು ಮಾಡುತ್ತಿದೆ. ಜತೆಗೆ, ಮಹಿಳೆಯರ ಸ್ವಾತಂತ್ರ್ಯದ ಕುರಿತು ಚರ್ಚೆಯನ್ನು ಹುಟ್ಟು ಹಾಕಿದೆ.

“ಇಂತಹ ಪ್ರಕರಣಗಳು ವರದಿಯಾದಾಗ ಮಾತ್ರ ದೊಡ್ಡ ಮಟ್ಟದಲ್ಲಿ ಸಾಮಾಜಿಕ ಚರ್ಚೆಯೊಂದು ಹುಟ್ಟಿಕೊಳ್ಳುತ್ತದೆ. ನಂತರ ಎಲ್ಲರೂ ಮರೆತು ಹೋಗುತ್ತಾರೆ. ಮುಂದೆ ಮತ್ತೊಂದು ಲೈಂಗಿಕ ದೌರ್ಜನ್ಯ ಪ್ರಕರಣ ವರದಿಯಾದಾಗ ಇದೇ ಪುನಾರಾವರ್ತನೆಯಾಗುತ್ತದೆ,” ಎನ್ನುತ್ತಾರೆ ಜನವಾದಿ ಮಹಿಳಾ ಸಂಘಟನೆಯ ಕೆ. ಎಸ್. ವಿಮಲಾ.

ಈ ಹಿನ್ನೆಲೆಯಲ್ಲಿ, ಮಹಿಳಾ ಹೋರಾಟಗಾರರು, ಪೊಲೀಸ್ ಅಧಿಕಾರಿಗಳು, ಮನಶಾಸ್ತ್ರಜ್ಞರು, ರಾಜಕಾರಣಿಗಳು, ಪತ್ರಕರ್ತರ ಅಭಿಪ್ರಾಯಗಳು ಮತ್ತು ರಾಷ್ಟ್ರೀಯ ಮಟ್ಟದಲ್ಲಿ ಲಭ್ಯ ಇರುವ ಅಂಕಿ ಅಂಶಗಳ ಮೂಲಕ ಮಹಿಳೆಯರ ಮೇಲೆ ನಡೆಯುವ ಸಾರ್ವಜನಿಕ ಲೈಂಗಿಕ ದೌರ್ಜನ್ಯಗಳಿಗೆ ಪರಿಹಾರ ಸೂತ್ರವೊಂದನ್ನು ಸ್ವತಂತ್ರ ಮಾಧ್ಯಮ ಸಂಸ್ಥೆ ‘ಸಮಾಚಾರ’ ನಿಮ್ಮೆದುರಿಗೆ ಇಡುವ ಪ್ರಯತ್ನ ಮಾಡುತ್ತಿದೆ.

sex-assault

ನಡೆಯುತ್ತಿರುವುದೇನು?:

ಮಹಿಳೆಯರ ಮೇಲೆ ನಡೆಯುವ ಲೈಂಗಿಕ ದೌರ್ಜನ್ಯಗಳ ಅಂಕಿ ಅಂಶವನ್ನು ಎದುರಿಗಿಟ್ಟುಕೊಂಡು ನೋಡಿದರೆ, ಐಟಿ ಸಿಟಿ ಬೆಂಗಳೂರು ದೇಶದಲ್ಲಿಯೇ ಮೂರನೇ ಸ್ಥಾನದಲ್ಲಿದೆ. 2015ರಲ್ಲಿ ದೇಶಾದ್ಯಂತ 91, 107 ಇಂತಹ ಪ್ರಕರಣಗಳು ದಾಖಲಾಗಿವೆ. ಇದರಲ್ಲಿ 5, 112 ಪ್ರಕರಣಗಳು ಕರ್ನಾಟಕದಿಂದಲೇ ವರದಿಯಾಗಿವೆ. ಈ ಮೂಲಕ ರಾಜ್ಯ ಐದನೇ ಸ್ಥಾನದಲ್ಲಿದೆ.

ಇನ್ನು ನಗರಗಳ ವಿಚಾರಕ್ಕೆ ಬಂದರೆ, 4, 563 ಪ್ರಕರಣಗಳ ಮೂಲಕ ದಿಲ್ಲಿ ಮೊದಲ ಸ್ಥಾನದಲ್ಲಿದೆ. ವಾಣಿಜ್ಯ ನಗರಿ ಮುಂಬೈ 2, 008 ಪ್ರಕರಣಗಳ ಮೂಲಕ 2ನೇ ಸ್ಥಾನದಲ್ಲಿದೆ. ನಂತರ ಸ್ಥಾನದಲ್ಲಿ ಬೆಂಗಳೂರು ಇದ್ದು, ವರ್ಷದಲ್ಲಿ 718 ಪ್ರಕರಣಗಳು ದಾಖಲಾಗಿವೆ ಎಂಬ ಅಂಕಿ ಅಂಶವನ್ನು ನ್ಯಾಷನಲ್ ಕ್ರೈಂ ರೆಕಾರ್ಡ್ ಬ್ಯುರೋದ 2015ರ ವರದಿ ಬಹಿರಂಗಪಡಿಸಿದೆ.

ಇಷ್ಟು ಪ್ರಮಾಣದಲ್ಲಿ ನಡೆಯುತ್ತಿರುವ ಈ ಲೈಂಗಿಕ ದೌರ್ಜನ್ಯಗಳು ಭಾರಿ ಸುದ್ದಿಯಾದಾಗಲೆಲ್ಲ ಕಾನೂನು ಸುವ್ಯವಸ್ಥೆ ಕುರಿತು ಗಂಭೀರ ಚರ್ಚೆಗೆ ನಾಂದಿ ಹಾಡುತ್ತವೆ. “ನಿಜ, ಇಂತಹ ಘಟನೆಗಳು ವರದಿಯಾದಾಗ ಪೊಲೀಸರ ಮೇಲೆ ಆರೋಪಗಳು ಕೇಳಿಬರುತ್ತವೆ. ಅದನ್ನು ಒಪ್ಪಿಕೊಳ್ಳೊಣ. ಆದರೆ, ಇದಕ್ಕೆ ಪರಿಹಾರ ಏನಿದೆ ಹೇಳಿ?” ಎಂದು ಪ್ರಶ್ನಿಸುತ್ತಾರೆ ರಾಜ್ಯ ಸಿಐಡಿಯಲ್ಲಿ ಡಿವೈಎಸ್ಪಿಯಾಗಿರುವ ಕಾಶಿ.

“ಉದಾಹರಣೆಗೆ ಎಂ. ಜಿ. ರಸ್ತೆಯ ಘಟನೆಯನ್ನೇ ತೆಗೆದುಕೊಳ್ಳಿ. ಅವತ್ತು ಅಲ್ಲಿ ಪೊಲೀಸರು ಭದ್ರತೆಗೆ ನೇಮಕಗೊಂಡಿದ್ದರು. ಅವರು ಲೈಂಗಿಕ ದೌರ್ಜನ್ಯ ತಡೆಯಲು ಏನು ಮಾಡಲು ಸಾಧ್ಯವಿತ್ತು. ಘಟನೆ ನಡೆಯುವ ಮುನ್ನವೇ ಅಲ್ಲಿ ಸೇರಿದ್ದ ಮಹಿಳೆಯರು ಮತ್ತು ಪುರುಷರನ್ನು ಪ್ರಶ್ನಿಸಿದರೆ ಮಾನವ ಹಕ್ಕುಗಳ ವಿಚಾರ ಬರುತ್ತಿತ್ತು. ಆಗಲೂ ಪೊಲೀಸರೇ ಆರೋಪಗಳನ್ನು ಹೊತ್ತುಕೊಳ್ಳಬೇಕಾಗುತ್ತಿತ್ತು,” ಎಂಬುದು ಅವರ ಸ್ಪಷ್ಟ ಅಭಿಪ್ರಾಯ. ಮುನ್ನೆಚ್ಚರಿಕಾ ಕ್ರಮಗಳನ್ನು ಮಹಿಳೆಯರೂ ತೆಗೆದುಕೊಳ್ಳಬೇಕಿತ್ತು ಎಂಬ ರಾಜ್ಯ ಗೃಹ ಸಚಿವ ಅಭಿಪ್ರಾಯವನ್ನು ತಾತ್ವಿಕವಾಗಿ ಪೊಲೀಸ್ ಅಧಿಕಾರಿ ಸಮರ್ಥಿಸಿಕೊಳ್ಳುತ್ತಾರೆ.

ಮೂಲ ಮನಸ್ಥಿತಿ:

ಹೊಸ ವರ್ಷಾಚರಣೆ ಸಮಯದಲ್ಲಿ ಎಂ. ಜಿ. ರಸ್ತೆಯಲ್ಲಿ ನಡೆದ ಘಟನೆಯ ಚಿತ್ರ.

ಹೊಸ ವರ್ಷಾಚರಣೆ ಸಮಯದಲ್ಲಿ ಎಂ. ಜಿ. ರಸ್ತೆಯಲ್ಲಿ ನಡೆದ ಘಟನೆಯ ಚಿತ್ರ.

ಇಂತಹ ಘಟನೆಗಳ ಕುರಿತು ಮಾನಸಿಕ ತಜ್ಞ ಡಾ. ಮಹೇಶ್ ಬೇರೆಯದೇ ಒಳನೋಟಗಳನ್ನು ನೀಡುತ್ತಾರೆ.

“ಸಾಮಾನ್ಯವಾಗಿ ಮಹಿಳೆಯರು ಧರಿಸುವ ಬಟ್ಟೆಗಳ ಬಗ್ಗೆ ಚರ್ಚೆ ನಡೆಯುತ್ತದೆ. ಅದು ಸರಿಯಲ್ಲ. ಅದರ ಬದಲು ಲೈಂಗಿಕ ದೌರ್ಜನ್ಯ ನಡೆಸುವವರ ಮನಸ್ಥಿತಿಯನ್ನು ಗಮನಿಸಬೇಕಿದೆ. ಕಾನೂನು, ವ್ಯವಸ್ಥೆಗಳ ಬಗ್ಗೆ ಗೌರವ ಇಲ್ಲದವರು ಮಾತ್ರವೇ ಇಂತಹ ಕೃತ್ಯಗಳನ್ನು ಎಸಗುತ್ತಾರೆ. ಜತೆಗೆ, ಲೈಂಗಿಕತೆ ಕುರಿತು ವಿಕ್ಷಿಪ್ತ ಮನಸ್ಥಿತಿ ಬೆಳೆಸಿಕೊಂಡವರಿಂದ ಕೃತ್ಯಗಳು ಜರುಗುತ್ತವೆ. ಅಂತವರನ್ನು ಗುರುತಿಸಿ, ಶಿಕ್ಷೆಯನ್ನು ನೀಡುವ ಕೆಲಸ ಆಗಬೇಕು. ಶಿಕ್ಷೆ ನೀಡುವ ವ್ಯವಸ್ಥೆಯೂ ಚುರುಕಾಗಬೇಕು,” ಎನ್ನುತ್ತಾರೆ ಅವರು.

ಸಾಮಾಜಿಕ ಹೊಣೆಗಾರಿಕೆ ಕುರಿತು ಗಮನ ಸೆಳೆಯುವ ಮೈದ್ಯರು, “ಸಮಾಜ ಕೂಡ ಇಂತಹ ಘಟನೆಗಳಿಗೆ ಸ್ಪಂದಿಸುವ ರೀತಿ ಬದಲಾಗಬೇಕು. ಕಣ್ಣ ಮುಂದೆಯೇ ಲೈಂಗಿಕ ದೌರ್ಜನ್ಯಗಳು ನಡೆಯುತ್ತಿದ್ದರೆ ನೋಡಿಕೊಂಡು ಸುಮ್ಮನೆ ನಿಲ್ಲುವುದು ಸರಿಯಲ್ಲ. ಜನ ಜಾಗೃತರಾಗಿ, ಇಂತಹ ಘಟನೆಗಳನ್ನು ಸ್ಥಳದಲ್ಲಿಯೇ ಖಂಡಿಸಿದರೆ, ಕೃತ್ಯ ಎಸಗುವವ ಮನಸ್ಥಿತಿಯೂ ಬದಲಾಗಬಹುದು,” ಎನ್ನುತ್ತಾರೆ ಡಾ. ಮಹೇಶ್.

ಇದೇ ಅಂಶವನ್ನು ಮಹಿಳಾ ಹೋರಾಟಗಾರರು ಉಲ್ಲೇಖಿಸುತ್ತಾರೆ. “ಲೈಂಗಿಕ ದೌರ್ಜನ್ಯಗಳು ಪ್ರಕರಣಗಳು ನಡೆದಾಗ ಮಹಿಳೆಯರನ್ನೇ ಗುರಿಯಾಗಿಸುವ ಮನಸ್ಥಿತಿ ಸಮಾಜದಲ್ಲಿದೆ. ಆಕೆ ಮಧ್ಯರಾತ್ರಿ ಯಾಕೆ ಹೋಗಬೇಕಿತ್ತು? ಅಂತಹ ಬಟ್ಟೆ ಯಾಕೆ ಧರಿಸಬೇಕಿತ್ತು? ಎಂಬ ಪ್ರಶ್ನೆಗಳು ಸಾಮಾನ್ಯವಾಗಿ ಕೇಳಿಬರುತ್ತವೆ. ಆದರೆ ದೌರ್ಜನ್ಯ ಎಸಗುವ ಪುರುಷರ ಮನಸ್ಥಿತಿಗೆ ಕಡಿವಾಣ ಹಾಕಲು ಯಾವ ಕ್ರಮ ಕೈಗೊಳ್ಳಬೇಕು ಎಂಬ ಕುರಿತು ಹೆಚ್ಚು ಚರ್ಚೆ ನಡೆಯುವುದಿಲ್ಲ. ಇಂತಹ ಪ್ರಕರಣಗಳಲ್ಲಿ ಕಾನೂನು ಪ್ರಕ್ರಿಯೆಗಳನ್ನು ಶೀಘ್ರ ಗತಿಯನ್ನು ಮುಗಿಯಲು ಕ್ರಮ ಕೈಗೊಳ್ಳಬೇಕು. ಶಿಕ್ಷೆ ಪ್ರಮಾಣವೂ ಹೆಚ್ಚಾಗಬೇಕು ಮತ್ತು ಅದರ ಮಾಹಿತಿ ಸಮಾಜಕ್ಕೂ ತಲುಪಬೇಕು. ಅದಾಗದಿದ್ದರೆ ಸಮಸ್ಯೆ ಸಮಸ್ಯೆಯಾಗಿಯೇ ಉಳಿದು ಹೋಗುತ್ತದೆ,” ಎನ್ನುತ್ತಾರೆ ವಿಮಲಾ.

ದಾಖಲಾಗುವ ಲೈಂಗಿಕ ದೌರ್ಜನ್ಯ ಪ್ರಕರಣಗಳಲ್ಲಿ ಶಿಕ್ಷೆಯ ಪ್ರಮಾಣದ ಅಂಕಿ ಅಂಶಗಳು ನಿರಾಶಾದಾಯಕವಾಗಿವೆ. ಮಹಿಳೆಯರು ಮತ್ತು ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯ ತಡೆ ಪರಿಣಿತರ ಸಮಿತಿ ಹೊರತಂದಿರುವ ಅಂಕಿ ಅಂಶಗಳ ಪ್ರಕಾರ, ಇಂತಹ ಪ್ರಕರಣಗಳಲ್ಲಿ ಕೇವಲ ಶೇ. 3ರಷ್ಟು ಶಿಕ್ಷೆಯ ತಾರ್ಕಿಕ ಅಂತ್ಯವನ್ನು ಕಾಣುತ್ತವೆ. ಅಂದರೆ, ದಾಖಲಾದ ನೂರು ಪ್ರಕರಣಗಳಲ್ಲಿ ಮೂರರಲ್ಲಿ ಮಾತ್ರವೇ ಅಪರಾಧಿಗಳಿಗೆ ಶಿಕ್ಷೆಯಾಗುತ್ತದೆ.

ಸಮಿತಿಯ ಅಧ್ಯಕ್ಷ ವಿ. ಎಸ್. ಉಗ್ರಪ್ಪ ಕೂಡ ಸಾಮಾಜಿಕ ಮನಸ್ಥಿತಿಯ ಬದಲಾವಣೆಗೆ ಒತ್ತು ನೀಡಿ ಮಾತನಾಡುತ್ತಾರೆ. “ಲೈಂಗಿಕ ದೌರ್ಜನ್ಯ ಎಸಗುವವರ ಮನಸ್ಥಿತಿಯನ್ನು ಬದಲಾಯಿಸಲು ಸರಕಾರ ಸಂಘಸಂಸ್ಥೆಗಳ ಸಹಯೋಗದಲ್ಲಿ ದೊಡ್ಡಮಟ್ಟದಲ್ಲಿ ಜಾಗೃತಿ ಕಾರ್ಯಕ್ರಮ ಹಮ್ಮಿಕೊಳ್ಳಬೇಕು. ಅದರ ಜತೆಗೆ, ಲೈಂಗಿಕ ದೌರ್ಜನ್ಯಕ್ಕೆ ಈಡಾದ ಮಹಿಳೆಯರೂ ಮುಂದೆ ಬಂದು ದೂರು ದಾಖಲಿಸಬೇಕು. ಹೀಗಾದಾಗ ಮಾತ್ರವೇ ಕಾನೂನಿನ ಅಡಿಯಲ್ಲಿ ಅಪರಾಧಿಗಳಿ ಶಿಕ್ಷೆ ಕೊಡಿಸಲು ಸಾಧ್ಯ. ನೂರಕ್ಕೆ 97 ಪ್ರಕರಣಗಳಲ್ಲಿ ಅಪರಾಧಿಗಳು ಸಾಕ್ಷ್ಯಾಧಾರಗಳ ಕೊರತೆಯಿಂದ ಬಿಡುಗಡೆ ಹೊಂದುತ್ತಿದ್ದಾರೆ,” ಎಂಬ ಮಾಹಿತಿಯನ್ನು ಉಗ್ರಪ್ಪ ನೀಡುತ್ತಾರೆ.

ಮಾಧ್ಯಮಗಳ ಪಾತ್ರ:

ಬೆಂಗಳೂರಿನಲ್ಲಿಯೇ ಖಾಸಗಿ ಶಾಲೆಯೊಂದರಲ್ಲಿ ನಡೆದ ಲೈಂಗಿಕ ದೌರ್ಜನ್ಯ, ತಾಂಝಾನಿಯಾ ಮಹಿಳೆಯ ಮೇಲೆ ನಡೆದ ಲೈಂಗಿಕ ಕಿರುಕುಳ ಪ್ರಕರಣಗಳು ದೊಡ್ಡಮಟ್ಟಕ್ಕೆ ಸದ್ದು ಮಾಡಿದ್ದವು. ಆದರೆ, ಅವುಗಳಲ್ಲಿ ತಾರ್ಕಿಕ ಅಂತ್ಯ ಏನಾಯಿತು ಎಂಬುದು ಇವತ್ತಿಗೂ ಮಾಧ್ಯಮಗಳಲ್ಲಿ ಒತ್ತು ನೀಡಿ ವರದಿಯಾಗಿಲ್ಲ. “ನಾವು ಸದ್ದಿ ಮಾಡುವುದರಲ್ಲಿಯೇ ಕಳೆದು ಹೋಗುತ್ತಿದ್ದೇವೆ. ನಮ್ಮ ಗಮನ ಲೈಂಗಿಕ ದೌರ್ಜನ್ಯ ಎಸಗಿದ ಆರೋಪಿಯ ಬಂಧನವಾಗುವವರೆಗೆ ಇರುತ್ತದೆ. ಲೈಂಗಿಕ ದೌರ್ಜನ್ಯಕ್ಕೆ ಈಡಾದ ಮಹಿಳೆಯರ ಪರಿಸ್ಥಿತಿ ಹೇಗಿದೆ ಎಂಬುದನ್ನು ಗಮನಿಸುವುದಿಲ್ಲ. ಅಂತಹ ಪ್ರಕರಣಗಳನ್ನು ಬೆನ್ನತ್ತುವುದಿಲ್ಲ. ಹೀಗಾಗಿ ಸದ್ದು ಗದ್ದಲಗಳ ನಡುವೆ ಸಮಸ್ಯೆಗೆ ಪರಿಹಾರವನ್ನು ಯಾವ ಮಾಧ್ಯಮಗಳೂ ನೀಡಲು ಸಾಧ್ಯವಾಗುತ್ತಿಲ್ಲ,” ಎನ್ನುತ್ತಾರೆ ‘ದಿ ನ್ಯೂಸ್ ಮಿನಿಟ್’ ನ್ಯೂಸ್ ಪೂರ್ಟಲ್ ಪ್ರಧಾನ ಸಂಪಾದಕಿ ಧನ್ಯಾ ರಾಜೇಂದ್ರನ್.

ಸದ್ಯ ಸುದ್ದಿಕೇಂದ್ರಕ್ಕೆ ಬಂದ ಪ್ರಕರಣಗಳಲ್ಲಿ ನಡೆಯುತ್ತಿರುವುದೂ ಅದೇ. ಬೆಂಗಳೂರು ಸ್ಥಳೀಯ ವಾಹಿನಿಗಳಿಗೆ ಮಾತ್ರವಲ್ಲ, ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಾಧ್ಯಮಗಳ ಪಾಲಿಗೂ ಟಿಆರ್ಪಿ ಎಂಬ ವೀಕ್ಷಕರ ರೇಟಿಂಗ್ ನೀಡುವ ಕಾಮಧೇನು. ಹೀಗಾಗಿ, ಇಲ್ಲಿ ಘಟಿಸುವ ಪ್ರಕರಣಗಳು ದೊಡ್ಡಮಟ್ಟಕ್ಕೆ ಸದ್ದು ಮತ್ತು ಗದ್ದಲಕ್ಕೆ ಕಾರಣವಾಗುತ್ತವೆ.

ಇವುಗಳ ಜತೆಗೆ, ತಜ್ಞರ ಅಭಿಪ್ರಾಯದಂತೆ ಪೊಲೀಸ್ ವ್ಯವಸ್ಥೆ, ಕಾನೂನು ವ್ಯವಸ್ಥೆ ಮತ್ತು ಸಾಮಾಜಿಕ ಮನಸ್ಥಿತಿಯ ಬದಲಾವಣೆ ಕಡೆಗೆ ಸಮಗ್ರ ಯೋಜನೆಗಳನ್ನು ಸರಕಾರ ರೂಪಿಸಬೇಕಿದೆ. ಇದಿಷ್ಟು ಜಿ. ಪರಮೇಶ್ವರ್ ನೇತೃತ್ವದ ರಾಜ್ಯ ಗೃಹ ಇಲಾಖೆ ಗಮನಕ್ಕೆ…

ENTER YOUR E-MAIL

Name
Email *
February 2017
M T W T F S S
« Jan    
 12345
6789101112
13141516171819
20212223242526
2728  

Top