An unconventional News Portal.

‘ಹೊಟ್ಟೆಪಾಡಿನ ನ್ಯಾಯ’: ಪತ್ರಕರ್ತರ ವೃತ್ತಿ ಬದುಕು ಮತ್ತು ಕಾನೂನು ಕಟ್ಟಳೆಗಳು!

‘ಹೊಟ್ಟೆಪಾಡಿನ ನ್ಯಾಯ’: ಪತ್ರಕರ್ತರ ವೃತ್ತಿ ಬದುಕು ಮತ್ತು ಕಾನೂನು ಕಟ್ಟಳೆಗಳು!

ವಿಭಿನ್ನ ವಿನ್ಯಾಸದ ವೃತ್ತಿಗಳಲ್ಲಿ ಪತ್ರಿಕೋದ್ಯಮ ಕೂಡಾ ಒಂದು. ಇಲ್ಲಿನ ಸವಾಲುಗಳು, ಕೆಲಸದ ಸಮಯಗಳು, ಒತ್ತಡಗಳ ವೈವಿಧ್ಯ ಬಹುಶಃ ಬೇರಾವ ವೃತ್ತಿಗಳಲ್ಲೂ ಕಾಣಲು ಸಾಧ್ಯವಿಲ್ಲ.Journalist

ಇದೇ ಕಾರಣಕ್ಕೋ ಏನೋ ಕೇಂದ್ರ ಸರಕಾರ ಕಾರ್ಮಿಕ ಇಲಾಖೆಯಡಿಯಲ್ಲಿ ಪತ್ರಕರ್ತರಿಗಾಗಿಯೇ ಪ್ರತ್ಯೇಕ (The Working Jiournalists and Other Newspaper Employees (Conditions of Service) and Miscellaneous Provisions Act – 1955) ಕಾಯ್ದೆಯನ್ನೂ ಜಾರಿಗೆ ತಂದಿದೆ; ಎಷ್ಟರ ಮಟ್ಟಿಗೆ ಪತ್ರಿಕೆಗಳು, ಟಿವಿ ಮಾಧ್ಯಮಗಳು, ನ್ಯೂಸ್ ಚಾನೆಲ್ಗಳು ಇದನ್ನು ಪಾಲನೆ ಮಾಡುತ್ತಿವೆ ಎಂಬುದು ಪ್ರತ್ಯೇಕ ಅಧ್ಯಾಯ.

ಸದ್ಯಕ್ಕೆ ಅವನ್ನೆಲ್ಲಾ ಪಕ್ಕಕ್ಕಿಟ್ಟು ಪತ್ರಕರ್ತರ ಕೆಲಸದ ಸಮಯ, ಶಿಫ್ಟ್ ಗಳ ಬಗ್ಗೆ ಗಮನ ಹರಿಸುವುದಾದರೆ, ಹೆಚ್ಚಿನ ಎಲ್ಲಾ ಸಂಸ್ಥೆಗಳೂ ಕೆಲಸದ ವೇಳೆಯ ವಿಚಾರದಲ್ಲಿ ಸರಕಾರದ ಕಾನೂನುಗಳನ್ನು ಸರಾಸಗಟಾಗಿ ಮೂಲೆಗೆ ತಳ್ಳಿವೆ. ಹಾಗಾದರೆ ಪತ್ರಕರ್ತರ ಕೆಲಸದ ಸಮಯದ ವಿಚಾರದಲ್ಲಿ ಕಾನೂನು ಏನು ಹೇಳುತ್ತದೆ? ಪ್ರಮುಖ ಅಂಶಗಳನ್ನು ಇಲ್ಲಿ ಪಟ್ಟಿ ಮಾಡಲಾಗಿದೆ.  ನಿಮ್ಮ ಕೆಲಸದ ವೇಳೆ, ಶೀಪ್ಟ್ಗಳು ಈ ಕಾನೂನಿನಂತೆ ಇದೆಯೇ? ಒಮ್ಮೆಯಾದರೂ ತುಲನೆ ಮಾಡಿ ನೋಡಿ.


ಸರಕಾರದ ಕಾನೂನಿನಂತೆ,

  1. ಯಾವುದೇ ಪತ್ರಕರ್ತನ ಕೆಲಸದ ವೇಳೆ, ಊಟದ ಸಮಯವನ್ನು ಹೊರತುಪಡಿಸಿ ಸತತ ನಾಲ್ಕು ವಾರಗಳಲ್ಲಿ ಒಟ್ಟಾರೆ 144 ಗಂಟೆ (ದಿನಕ್ಕೆ 6 ಗಂಟೆಗಳಂತೆ, ವಾರದ ಆರು ದಿನ) ಗಳನ್ನು ಮೀರಬಾರದು.

  2. ಪ್ರತಿಯೊಬ್ಬ ಪತ್ರಕರ್ತನಿಗೂ ಸತತ ಏಳು ದಿನಗಳ ಅವಧಿಯಲ್ಲಿ ಕನಿಷ್ಠ 24 ಗಂಟೆಗಳ (ಒಂದು ದಿನ) ಬಿಡುವು ನೀಡಲೇಬೇಕು. ಈ ಬಿಡುವಿನಲ್ಲಿ ರಾತ್ರಿ 10 ರಿಂದ ಬೆಳಿಗ್ಗೆ 6 ಗಂಟೆಗಳವರೆಗಿನ ಅವಧಿ ಸೇರಿರಬೇಕು.

  3. ಒಂದೊಮ್ಮೆ ಕೆಲಸದ ಒತ್ತಡದಿಂದ ಹೆಚ್ಚಿನ ಅವಧಿ ದುಡಿಸಿಕೊಳ್ಳಬೇಕಾಗಿ ಬಂದರೂ ಸತತ ಎರಡು ವಾರಗಳ ಅವಧಿಯಲ್ಲಿ 144 ಗಂಟೆಗಳನ್ನು ಯಾವುದೇ ಕಾರಣಕ್ಕೂ ಮೀರುವಂತಿಲ್ಲ.

  4. ಈ ಮೇಲಿನ ನಿಯಮಗಳು ಸಂಪಾದಕ, ಪ್ರತಿನಿಧಿಗಳು, ವರದಿಗಾರರು ಮತ್ತು ಕ್ಯಾಮೆರಾಮನ್ಗಳಿಗೆ ಅನ್ವಯಿಸುವುದಿಲ್ಲ. ಇವರು ಅಸೈನ್ಮೆಂಟುಗಳನ್ನು ಮುಗಿಸುವುದು ಮುಖ್ಯ. ಆದರೆ ಪ್ರತಿ ಅಸೈನ್ಮೆಂಟಿನ ಮಧ್ಯೆ 2 ಗಂಟೆಗಳ ವಿರಾಮ ತೆಗೆದುಕೊಳ್ಳಬಹುದು. ಹೀಗಿದ್ದೂ ಕೆಲಸದ ಅವಧಿ ವಾರದಲ್ಲಿ 36 ಗಂಟೆಗಳನ್ನು ಮೀರಬಾರದು.

  5. ವೃತ್ತಿಪರ ಪತ್ರಕರ್ತನ ದಿನದ ಕೆಲಸ ಅವಧಿ ಊಟದ ಸಮಯವನ್ನು ಹೊರತುಪಡಿಸಿ ದಿನದ ವೇಳೆ 6 ಗಂಟೆಯಾದರೆ, ರಾತ್ರಿ ಪಾಳಿಯಲ್ಲಿ 5:30 ಗಂಟೆಯಾಗಿರುತ್ತದೆ.

  6. ಒಂದೊಮ್ಮೆ ನಿಗದಿತ ಅವಧಿಗಿಂತ ಹೆಚ್ಚುವರಿ ಕೆಲಸ ಮಾಡಬೇಕಾಗಿ ಬಂದರೆ ಅದಕ್ಕೆ ಪರಿಹಾರವನ್ನು (ಓಟಿ) ನೀಡಬೇಕು.

  7. ಹೊಸ ‘ವೇಜ್ ಬೋರ್ಡ್’ ನಿಯಮದಂತೆ ಪ್ರತಿ ನೈಟ್ ಶಿಫ್ಟಿಗೂ 500 ಕೋಟಿಗಿಂತ ಹೆಚ್ಚಿನ ವ್ಯವಹಾರ ಇರುವ ಮಾಧ್ಯಮ ಸಂಸ್ಥೆಗಳು 100 ರೂಪಾಯಿ ಹಾಗೂ 500 ಕೋಟಿಗಿಂತ ಕಡಿಮೆ ವ್ಯವಹಾರ ಇರುವ ಕಂಪೆನಿಗಳು 50 ರೂಪಾಯಿ ಹೆಚ್ಚುವರಿ ಹಣ ನೀಡಬೇಕು.

  8. ವೃತ್ತಿಪರ ಪತ್ರಕರ್ತ ವರ್ಷದಲ್ಲಿ 10 ದಿನಗಳ ಸಂಬಳ ಸಹಿತ ರಜೆ ಪಡೆಯಲು ಅರ್ಹನಾಗಿರುತ್ತಾನೆ. ಒಂದೊಮ್ಮೆ ವೀಕ್ ಆಫ್ನಲ್ಲಿ ಪತ್ರಕರ್ತ ಕೆಲಸ ಮಾಡಿದಲ್ಲಿ ಆ ದಿನದ ಸಂಬಳವನ್ನು ಬೋನಸ್ ಆಗಿ ನೀಡಬೇಕಾಗುತ್ತದೆ.

  9. ವರ್ಷಕ್ಕೆ 15 ಕ್ಯಾಶುವಲ್ ಲೀವ್ ಗಳೂ ಪತ್ರಕರ್ತರಿಗಿವೆ. ಇನ್ನು ಅರ್ಧ ಸಂಬಳ ಪಡೆದುಕೊಂಡು ಒಂದಷ್ಟು ಮೆಡಿಕಲ್ ಲೀವ್ ಪಡೆದುಕೊಳ್ಳಲೂ ಅವಕಾಶಗಳಿವೆ.

  10. ಮಹಿಳಾ ಪತ್ರಕರ್ತರಿಗೆ ಮೂರು ತಿಂಗಳ ಸಂಬಳ ಸಹಿತ ಹೆರಿಗೆ ರಜೆ, ಜೊತೆಗೆ ಇನ್ನೊಂದಷ್ಟು ರಜೆಗಳನ್ನು ಪಡೆದುಕೊಳ್ಳಲು ಮುಕ್ತ ಅವಕಾಶಗಳಿವೆ.

ಇವೆಲ್ಲವನ್ನೂ ಹೊರತುಪಡಿಸಿಯೂ ಒಂದಷ್ಟು ಹಾಲಿಡೇಗಳನ್ನು ಅನುಭವಿಸಬಹುದು. ಈಗ ಹೇಳಿ ಇದರಲ್ಲಿ ಎಷ್ಟು ರಜೆಗಳನ್ನು ನಿಮಗೆ ನಿಮ್ಮ ಸಂಸ್ಥೆ ನೀಡುತ್ತದೆ? ಎಷ್ಟು ರಜೆಗಳನ್ನು ನೀವು ಪಡೆದುಕೊಂಡಿದ್ದೀರಿ?

24 ಗಂಟೆಯೂ ಪತ್ರಕರ್ತರಾಗಿರಬೇಕು ಎನ್ನುವುದನ್ನು ಎಲ್ಲಾ ಸಂಪಾದಕರೂ ಆಗಾಗ ಹೇಳುತ್ತಲೇ ಇರುತ್ತಾರೆ. ಪತ್ರಕರ್ತರಾಗಿರಬೇಕಾದುದು ಹೌದು; ಆದರೆ ಕೆಲಸವೇ ಮಾಡಬೇಕು ಎಂದೇನೂ ಇಲ್ಲವಲ್ಲ. ಸರಕಾರದ ಕಾನೂನನ್ನೆಲ್ಲಾ ಒಂದೇಟಿಗೆ ಪ್ರಶ್ನೆ ಮಾಡುವ ಮಾಧ್ಯಮ ಸಂಸ್ಥೆಗಳು ಇದರಲ್ಲಿ ಎಷ್ಟು ಸೌಲಭ್ಯಗಳನ್ನು ತಮ್ಮದೇ ಸಂಸ್ಥೆಯ ಪತ್ರಕರ್ತರಿಗೆ ನೀಡಿವೆ? ನಿರ್ಧಾರ ನಿಮ್ಮ ವಿವೇಚನೆಗೆ ಬಿಟ್ಟದ್ದು. ಕಾನೂನಿನಲ್ಲಿ ಇದ್ದ ಅಂಶಗಳನ್ನಷ್ಟೇ ಇಲ್ಲಿ ಪ್ರಸ್ತಾಪಿಸಿದ್ದೇವೆ.

Top