An unconventional News Portal.

‘ಬಸ್ ಮೋದಿಜಿ ಬಸ್’: ನೋಟ್ ಬ್ಯಾನ್ ಮಾಡಿ ದೇಶವಾಸಿಗಳನ್ನು ಮೂರ್ಖರನ್ನಾಗಿ ಮಾಡಿಬಿಟ್ಟಿರಿ!

‘ಬಸ್ ಮೋದಿಜಿ ಬಸ್’: ನೋಟ್ ಬ್ಯಾನ್ ಮಾಡಿ ದೇಶವಾಸಿಗಳನ್ನು ಮೂರ್ಖರನ್ನಾಗಿ ಮಾಡಿಬಿಟ್ಟಿರಿ!

ಸುಮಾರು 3 ಲಕ್ಷ ಕೋಟಿ ರೂಪಾಯಿಗಳು…

ಇದು, ಕಳೆದ ವರ್ಷ ನವೆಂಬರ್ ಸಮಯದಲ್ಲಿ ಶೇಖರಣೆಗೊಂಡಿದೆ ಎಂದು ನಂಬಲಾದ ‘ಕಪ್ಪು ಹಣ’ದ ಭಾರಿ ಮೊತ್ತ. 8ನೇ ತಾರೀಖು ಪ್ರಧಾನಿ ಮೋದಿ ಚಲಾವಣೆಯಲ್ಲಿದ್ದ 500 ಹಾಗೂ 1000 ಮುಖಬೆಲೆಯ ನೋಟುಗಳ ಚಲಾವಣೆಯನ್ನು ಸರಕಾರ ಹಿಂತೆಗೆದುಕೊಳ್ಳುವುದಾಗಿ ಘೋಷಣೆ ಮಾಡಿದರು. ಕಪ್ಪು ಹಣದ ವಿರುದ್ಧ ಹೋರಾಟ, ಭ್ರಷ್ಟಾಚಾರದ ವಿರುದ್ಧ ಸಮರ, ನಕಲಿ ನೋಟುಗಳ ಚಲಾವಣೆಗೆ ಕಡಿವಾಣ, ಈ ಮೂಲಕ ಭಯೋತ್ಪಾದಕರ ಆರ್ಥಿಕ ಮೂಲಕ್ಕೆ ಹೊಡೆತ ಹೀಗೆ ಸಾಲು ಸಾಲು ಆಶಯಗಳನ್ನು ಭಿತ್ತುವ ಪ್ರಯತ್ನವೂ ಇದರ ಜತೆಗೆ ತಳುಕು ಹಾಕಿಕೊಂಡಿತು. ನಂತರ ದಿನಗಳಲ್ಲಿ ನಿಧಾನವಾಗಿ ನೋಟುಗಳ ಅಮಾನ್ಯೀಕರಣ ನಗದು ರಹಿತ ಆರ್ಥಿಕ ವ್ಯವಸ್ಥೆಯ ನಿರ್ಮಾಣದ ಹಿನ್ನೆಲೆಯಲ್ಲಿ ಹುಟ್ಟಿಕೊಂಡ ಯೋಜನೆ ಎಂದು ತೇಲಿಸುವ ಪ್ರಯತ್ನವೂ ಕೇಂದ್ರ ಸರಕಾರದ ಕಡೆಯಿಂದ ನಡೆಯಿತು.

ರಾತ್ರೋ ರಾತ್ರಿ ನೋಟ್ ಬ್ಯಾನ್ ಪರಿಣಾಮ ಸಾಮಾನ್ಯ ಜನ ತಮ್ಮ ಬಳಿ ಇದ್ದ 500 ಹಾಗೂ 1000 ನೋಟುಗಳ ಬದಲಾವಣೆಗೆ ಬ್ಯಾಂಕ್‌ಗಳ ಮುಂದೆ ಸರತಿ ಸಾಲಿನಲ್ಲಿ ನಿಂತರು. ಆದರೆ, ಬ್ಯಾಂಕ್‌ಗಳು ನೋಟು ಬದಲಾವಣೆಯ ದಂಧೆಗೆ ಇಳಿದವು. ಜನರಿಗೆ ಸಕಾಲದಲ್ಲಿ ಬದಲಿ ನಗದು ಸಿಗದಂತಾಯಿತು. ಸುಮಾರು 140 ಜನ ಸಾವನ್ನಪ್ಪಿದರು. ಬೀದಿ ವ್ಯಾಪಾರಿಗಳು, ಸಣ್ಣ ಉದ್ಯಮಗಳು ನೆಲಕ್ಕಿದವು. ಆರ್ಥಿಕ ಹಾಹಾಕಾರವೊಂದು ದೇಶವನ್ನು ಆವರಿಸಿತು. ಅದೇ ವೇಳೆ ಸರಕಾರದ ಅಮಾನ್ಯೀಕರಣದ ಯೋಜನೆಯನ್ನು ಬಳಸಿಕೊಂಡಿದ್ದು ‘ಪೇಟಿಎಂ’ನಂತಹ ಕಾರ್ಪೊರೇಟ್ ಕಂಪನಿಗಳು. ನಗದು ರಹಿತ ಆರ್ಥಿಕ ವ್ಯವಸ್ಥೆಗೆ ಉತ್ತೇಜನ ನೀಡುವ ನೆಪದಲ್ಲಿ ಕೋಟ್ಯಾಂತರ ರೂಪಾಯಿಗಳ ವಹಿವಾಟವನ್ನು ಅವು ಕಂಡವು.

ಇವೆಲ್ಲವೂ ನಡೆದು ಹೆಚ್ಚು ಕಡಿಮೆ 11 ತಿಂಗಳ ನಂತರ ನೋಟುಗಳ ಅಮಾನ್ಯೀಕರಣದ ಸಂಬಂಧಪಟ್ಟ ಹಾಗೆ ಮೊದಲ ಬಾರಿಗೆ ಭಾರತೀಯ ರಿಸರ್ವ್ ಬ್ಯಾಂಕ್‌ (ಆರ್‌ಬಿಐ) ಅಧಿಕೃತ ಮಾಹಿತಿ ಹೊರಹಾಕಿದೆ. ವ್ಯವಸ್ಥೆಯಲ್ಲಿ ಚಲಾವಣೆಯಲ್ಲಿದ್ದ ಶೇ.99ರಷ್ಟು ನೋಟುಗಳು ಬ್ಯಾಂಕ್‌ಗಳಿಗೆ ಹಿಂತಿರುಗಿದೆ ಎಂದು ಅದು ಹೇಳಿದೆ. ಅಂದರೆ, ಕಪ್ಪು ಹಣ ಎಂದು ಅಂದಾಜಿಸಿದ್ದ 3 ಲಕ್ಷ ಕೋಟಿ ಕೂಡ ಬ್ಯಾಂಕ್‌ಗಳಿಗೆ ವಾಪಾಸ್ ಬಂದು, ಹೊಸ ನೋಟುಗಳ ರೂಪದಲ್ಲಿ ಮತ್ತೆ ಕುಳಗಳ ಕೈಗೆ ತಲುಪಿದೆ. ಅಥವಾ ದೇಶದಲ್ಲಿ ಅಷ್ಟು ಪ್ರಮಾಣದ ‘ಕಪ್ಪು ಹಣ’ವೇ ಇರಲಿಲ್ಲ!

ಹಾಗಾದರೆ, ನೋಟ್ ಬ್ಯಾನ್‌ ಮೂಲಕ ‘ಕಪ್ಪು ಹಣ’ದ ವಿರುದ್ಧ ಹೋರಾಟ ಎಂಬ ಪ್ರಧಾನಿ ಮೋದಿ ಘೋಷಣೆ ಬರೀ ಘೋಷಣೆ ಮಾತ್ರವೇ ಆಗಿ ಉಳಿಯಿತಾ? ಹೌದು ಎನ್ನುತ್ತಿದೆ ಸದ್ಯ ಲಭ್ಯವಾಗಿರುವ ಮಾಹಿತಿ.

ದೇಶದಲ್ಲಿ ನವೆಂಬರ್‌ ತಿಂಗಳಿಗೂ ಮುಂಚೆ ಚಲಾವಣೆಯಲ್ಲಿದ್ದ ಹಣದಲ್ಲಿ 500 ಹಾಗೂ 1000 ಮುಖಬೆಲೆಯ ನೋಟುಗಳ ಒಟ್ಟು ಮೊತ್ತ 15.44 ಲಕ್ಷ ಕೋಟಿ ರೂಪಾಯಿಗಳು. ಇದರಲ್ಲಿ 3 ಲಕ್ಷ ಕೋಟಿ ‘ಕಪ್ಪು ಹಣ’ ಎಂಬ ಅಂದಾಜಿತ್ತು. ನೋಟ್ ಬ್ಯಾನ್‌ ನಂತರ ಈ ಕಪ್ಪು ಹಣ ಮತ್ತೆ ವ್ಯವಸ್ಥೆಗೆ ಹಿಂತಿರುಗಿ ಬಾರದು ಎಂಬ ನಿರೀಕ್ಷೆ ಇತ್ತು. ಇಷ್ಟು ಪ್ರಮಾಣದ ಹಣವನ್ನು ಆರ್‌ಬಿಐ ಮರು ಮುದ್ರಿಸಿ ಚಲಾವಣೆಗೆ ಬಿಡಲಿದೆ, ಇದರಿಂದ ಆರ್ಥಿಕ ವ್ಯವಸ್ಥೆ ಭಾರಿ ಪ್ರಮಾಣದಲ್ಲಿ ಚೇತರಿಕೆ ಕಾಣುತ್ತದೆ ಎಂದೆಲ್ಲಾ ಹೇಳಲಾಗಿತ್ತು. ಆದರೆ, ಇದೀಗ ಶೇ.99ರಷ್ಟು ನೋಟುಗಳು ಬ್ಯಾಂಕ್‌ಗಳಿಗೆ ಹಿಂತಿರುಗಿ ಬಂದಿವೆ. ಅವುಗಳ ಒಟ್ಟು ಮೌಲ್ಯ, 15.28 ಲಕ್ಷ ಕೋಟಿ. ನೋಟುಗಳ ಅಮಾನ್ಯೀಕರಣದಿಂದ ಆರ್ಥಿಕ ವ್ಯವಸ್ಥೆಗೆ ಮರಳಿ ಬಾರದ ಸೋ ಕಾಲ್ಡ್ ‘ಕಪ್ಪು ಹಣ’ದ ಪ್ರಮಾಣ ಅಂದಾಜು ಕೇವಲ 16 ಸಾವಿರ ರೂಪಾಯಿ ಕೋಟಿ. ಇದನ್ನು ದೇಶವಾಸಿಗಳು ನಂಬಬೇಕಿದೆ. ಇದೇ ವೇಳೆ, ಹೊಸ ನೋಟುಗಳ ಮುದ್ರಣಕ್ಕೆ ಖರ್ಚಾಗಿದ್ದು 7, 965 ಕೋಟಿ ರೂಪಾಯಿಗಳು ಎಂಬುದನ್ನೂ ಗಮನಿಸಬೇಕಿದೆ.

ಇನ್ನು, ಸರಕಾರದ ಭಯೋತ್ಪಾದನೆ ವಿರುದ್ಧದ ಸಮರದ ಘೋಷಣೆ ಕತೆ. ನೋಟುಗಳ ಅಮಾನ್ಯೀಕರಣದ ಮೂಲಕ ದೇಶದ ಗಡಿಯಲ್ಲಿ ಒಳಗೂ, ಹೊರಗೂ ಚಲಾವಣೆಯಲ್ಲಿದ್ದ ಸುಮಾರು 400 ಕೋಟಿ ಕನಲಿ ನೋಟುಗಳ ವಹಿವಾಟಿಗೆ ಕಡಿವಾಣ ಬೀಳುತ್ತದೆ ಎಂದು ಘೋಷಣೆ ಮಾಡಲಾಗಿತ್ತು. ಆದರೆ, 2000 ಮುಖಬೆಲೆಯ ಹೊಸ ನೋಟು ಜನರ ಕೈ ಸೇರುವ ಮುಂಚೆಯೇ, ಅದರ ತದ್ರೂಪಗಳು ಚಲಾವಣೆಗೆ ಬಂದಾಗಿತ್ತು ಎಂಬುದು ವ್ಯಂಗ್ಯ. ಕೊನೆಗೆ, ಕಳೆದ ಜುಲೈ ತಿಂಗಳಿನಲ್ಲಿ ಸಂಸತ್‌ನಲ್ಲಿ ಪ್ರಶ್ನೆಯೊಂದನ್ನು ಉತ್ತರಿಸಿದ ಆರ್ಥಿಕ ಸಚಿವ ಅರುಣ್‌ ಜೇಟ್ಲಿ, ನೋಟುಗಳು ಅಮಾನ್ಯೀಕರಣದ ನಂತರವೂ ದೇಶದ 11 ರಾಜ್ಯಗಳಲ್ಲಿ ವಶಕ್ಕೆ ಪಡೆದ ನಕಲಿ ನೋಟುಗಳ ಪ್ರಮಾಣ 11. 23 ಕೋಟಿ ಎಂದು ತಿಳಿಸಿದ್ದರು. ಅಂದರೆ, ನೋಟುಗಳ ಅಮಾನ್ಯೀಕರಣಕ್ಕೂ ನಕಲಿ ನೋಟುಗಳ ತಡೆಗೂ ಸಂಬಂಧವೇ ಇರಲಿಲ್ಲ ಎಂದಾಯಿತು.

ಇವತ್ತಿಗೂ ಕೇಂದ್ರ ಸರಕಾರ ನೋಟುಗಳ ಅಮಾನ್ಯೀಕರಣ ಪ್ರಕ್ರಿಯೆಯನ್ನು ಸಮರ್ಥನೆ ಮಾಡಿಕೊಳ್ಳಲು ಬಳಸುವ ವಿಚಾರ, ದೇಶದ ತೆರಿಗೆ ವ್ಯವಸ್ಥೆಗೆ ಹೊಸ ತೆರಿಗೆದಾರರ ಸೇರ್ಪಡೆ ಸಾಧ್ಯವಾಗಿಸಿದೆ ಎಂಬುದು. ಶೇ. 25ರಷ್ಟು ಜನ ಹೊಸತಾಗಿ ತೆರಿಗೆ ಪಾವತಿ ಮಾಡತ್ತಿದ್ದಾರೆ, ಇದು ಅಮಾನ್ಯೀಕರಣದ ನಂತರ ನಡೆದ ಮಹತ್ವದ ಬೆಳೆವಣಿಗೆ ಎಂದು ಕೇಂದ್ರ ಸರಕಾರ ಹೇಳುತ್ತಿದೆ. ಸ್ವಲ್ಪ ಆಳಕ್ಕಿಳಿದು ನೋಡಿದರೆ, ಇಲ್ಲಿಯೂ ಕೂಡ ಒಂದಷ್ಟು ಲೂಪ್‌ಹೋಲ್‌ಗಳು ಕಾಣಿಸುತ್ತಿವೆ.

ಹಣಕಾಸು ಸಚಿವ ಅರುಣ್ ಜೇಟ್ಲಿ ಹೊಸದಾಗಿ ತೆರಿಗೆ ವ್ಯವಸ್ಥೆಗೆ ಸೇರ್ಪಡೆಗೊಂಡವರು ಸಂಖ್ಯೆ 91 ಲಕ್ಷ ಎಂದು ಹೇಳುತ್ತಿದ್ದಾರೆ. ಪ್ರಧಾನಿ ಮೋದಿ ಇದೇ ಸಂಖ್ಯೆ 33 ಲಕ್ಷ ಎಂದಿದ್ದಾರೆ. ಸಮೀಕ್ಷೆಗಳ ಪ್ರಕಾರ 5.4 ಲಕ್ಷ ಜನ ಹೊಸ ತೆರಿಗೆದಾರರ ಸೇರ್ಪಡೆಯಾಗಿದೆ ಎಂದು ಹೇಳಲಾಗುತ್ತಿದೆ. ಹೀಗೆ, ಒಂದಕ್ಕೊಂದು ಸಂಬಂಧ ಇಲ್ಲದ ಅಂಕಿ ಅಂಶಗಳ ನಡುವೆ ಹೊಸತಾಗಿ ಒಂದಷ್ಟು ಜನ ತೆರಿಗೆ ಪಾವತಿ ಮಾಡಲು ಮುಂದಾಗಿರುವುದು ನಿಜ. ಆದರೆ ಅದಕ್ಕೆ ಕಾರಣ ನೋಟುಗಳ ಅಮಾನ್ಯೀಕರಣ ಪ್ರಕ್ರಿಯೆನಾ? ಇಲ್ಲ ಎನ್ನುತ್ತಿವೆ ಲಭ್ಯ ಇರುವ ಮಾಹಿತಿ. ಸರಕಾರದ ಹೊಸ ತೆರಿಗೆ ನೀತಿ, ತೆರಿಗೆದಾರರ ಸಂಬಳದ ಮಿತಿಯನ್ನು ಕಡಿಮೆ ಮಾಡಿರುವುದು, ಪಾನ್‌ ಕಾರ್ಡ್‌ ಹಾಗೂ ಆಧಾರ್‌ಗಳ ಜೋಡಣೆ ಮತ್ತಿತರ ಅಂಶಗಳು ಈ ಹೊಸ ತೆರಿಗೆದಾರರ ಸೃಷ್ಟಿಗೆ ಕಾರಣವೇ ಹೊರತು, ಅಮಾನ್ಯೀಕರಣ ಪ್ರಕ್ರಿಯೆ ಅಲ್ಲ ಎಂದು ವರದಿಗಳು ಹೇಳುತ್ತಿವೆ. ಕೇವಲ ಒಂದಷ್ಟು ಲಕ್ಷ ಹೊಸ ತೆರಿಗೆದಾರರ ಸೇರ್ಪಡೆಗಾಗಿ ಅಮಾನ್ಯೀಕರಣದಂತಹ ದೊಡ್ಡ ಸರ್ಕಸ್ ನಡೆಸುವ ಅಗತ್ಯ ಏನಿತ್ತು? ದೇಶವಾಸಿಗಳ ಪ್ರಶ್ನೆಗೆ ಪ್ರಧಾನಿ ಉತ್ತರ ನೀಡಬೇಕಿದೆ.

ಕೊನೆಯದಾಗಿ, ಕ್ಯಾಶ್ ಲೆಸ್ ಇಂಡಿಯಾದ ಘೋಷಣೆ. ನೋಟುಗಳ ಅಮಾನ್ಯೀಕರಣದ ನಂತರ ದೇಶದ ಆರ್ಥಿಕ ವ್ಯವಸ್ಥೆಯನ್ನು ನಗದು ರಹಿತ ವಹಿವಾಟಿಗೆ ತರುವ ಪ್ರಯತ್ನ ಎಂದು ಹೇಳಲಾಗಿತ್ತು. ಆರಂಭದಲ್ಲಿ ಕ್ಯಾಶ್ ಲೆಸ್ ವರ್ಗಾವಣೆಗಳು ದೊಡ್ಡ ಪ್ರಮಾಣದಲ್ಲಿ ನಡೆಯಿತು ಕೂಡ. ಆದರೆ ಕಳೆದ ಮೇ ತಿಂಗಳ ವೇಳೆಗೆ ಮತ್ತೆ ಭಾರತೀಯರು ತಮ್ಮ ಹಳೆಯ ನಗದು ವರ್ಗಾವಣೆಯ ಸಂಪ್ರದಾಯಕ್ಕೆ ಮರಳಿ ಬಂದಿದ್ದಾರೆ ಎನ್ನತ್ತವೆ ಅಂಕಿ ಅಂಶಗಳು. ಹೀಗಿರುವಾಗ, ನಗದು ರಹಿತ ವ್ಯವಸ್ಥೆ ತರಲು ನೋಟ್ ಬ್ಯಾನ್ ಮಾಡಲಾಗಿದೆ ಎಂಬ ಘೋಷಣೆ, ಬರೀ ಘೋಷಣೆ ಅಷ್ಟೆ ಅಲ್ವಾ?

ಯಾವ ಕೋನದಿಂದ ನೋಡಿದರೆ, ಕಳೆದ ನವೆಂಬರ್ ತಿಂಗಳಿನಲ್ಲಿ ನಡೆದ ದೇಶದ ಆರ್ಥಿಕ ವ್ಯವಸ್ಥೆಯ ಬಹುದೊಡ್ಡ ಪ್ರಯೋಗ ನೆಲಕ್ಕಚ್ಚಿದೆ. ಸರಕಾರ ಅಂದುಕೊಂಡ ಯಾವ ಗರಿಯನ್ನೂ ಮುಟ್ಟಲು ಸಾಧ್ಯವಾಗಿಲ್ಲ. ಹೀಗಿರುವಾಗ, ನಿಜಕ್ಕೂ ನೋಟುಗಳ ಅಮಾನ್ಯೀಕರಣ ಪ್ರಕ್ರಿಯೆ ನಡೆಸಿದ್ದು ಯಾಕೆ? ಹೀಗೊಂದು ಪ್ರಶ್ನೆ ಎದ್ದು ನಿಲ್ಲುತ್ತದೆ. ‘ನೋಟುಗಳ ಅಮಾನ್ಯೀಕರಣ ದೇಶ ಕಂಡ ಬಹುದೊಡ್ಡ ಹಗರಣ’ ಎಂಬ ವಿರೋಧ ಪಕ್ಷಗಳ ಆರೋಪದಲ್ಲಿ ಹುರುಳು ಇರುವ ಸಾಧ್ಯತೆ ಇದೆ. ಆದರೆ, ಅದಕ್ಕೆ ಸಾಕ್ಷಿಗಳನ್ನು ಜನರ ಮುಂದಿಡುವ ಹೊಣೆಗಾರಿಕೆ ಅವುಗಳ ಮೇಲಿದೆ.

Top